《彝族克智》
出版单位：四川出版集团 四川民族出版社 出版发行
编号：ISBN7-5409-3284-8/K•252(
作者：《彝族克智》编委会 编
开本：大16开
页数：975页
出版时间：
装帧：简装
定价：精装
图书介绍
点赞+
ꅇ ꌐ ꁌ
ꆈꌠꆹꐩꋊꀊꎴ、ꊻꂷꀉꑌ、ꋥꁕꀊꐯꌠꍏꉸꊿꋅꉬꊰꃘꁯꌠꈐꏭꋍꁯꉬ。ꆈꌠꆹꐧꋦꐩꋊꈺꆹꎳꆹꀋꂿꊨꌠꈐꏭꄉꊋꋠꏢꅝꃅꀻꎆꅷꀃꑍꋍꄮꑟꇁꌠꉬ。ꐩꋊꆺꊂꇬꆈꌠꌧꇐꁱꀕꍸꇐꃴꇁꆧꈤꒉ、ꏂꇁꏪꈤꁏꑠꌐꀋꉆꃅꐥ。ꀑꐱꃅꉉꇬꐞꃀꀉꒉꑠꌕꐘꐥ:ꋍꐘꆏꏂꀨꊋꒉꃅꐥꌠꀘꂾꌧꇐ;ꑍꐘꌠꆏꅡꈭꌟꒉꌌꌠꈌꈴꌧꇐꃆꍝꑘꇠꃆꂮꃣꈌꄉꏦ;ꌕꐘꌠꆏꄯꒉꏂꀨꀁꑌꃅꐥꌠꎃꀕꌧꇐ。ꎃꀕꌧꇐꈐꏭꆹ《ꁱꋊꅺꊈ》ꌋꆀ《ꂘꃅꄯꒉ》ꏂꀨꑠꆏꀱꉠꄹꐒꃅꇇꁱꄉꌠꐥ,ꀉꁁꆏꈌꈴꌧꇐ《ꈍꎞꃨꆳ》、《ꀉꁌꁮꅉ》、《ꊝꉗꃆꃀ》、《ꀊꌦꀕꇠꅇ》ꌋꆀ《ꇐꀳꇏꏢ》ꑠꌐꀋꉆ。ꋋꆹꍏꉸꊿꋅꌧꇐꁱꀕꍸꇈꌠꈐꏭ”ꃆꄙꈬꂷꁌ,ꏂꅪꈬꒀꁌ”ꀋꋌꌠꐩꋊꍸꇐꐘꉬ。
《ꈍꎞ》ꄷꌠꆹ“ꈌꈴꄉꎞꌊꐺꌠꅇꂷꉐꂷꈨꄜ”。ꎃꀕꈌꈴꌧꇐꈐꏭꃆꃀꃷꁨꀉꑌꐯꀉꑌꌠꆏ《ꈍꎞꃨꆳ》ꋌꑵꉬ。ꋋꆹꊋꒉꌠꌌꑮꑟꅪꏷ、ꊿꀘꑳꂿ、ꁍꃀꀿꃀꃀꐚꄮꇬꀉꄂꌧꑵꉬ。ꀋꃋꏓꈹꁰꄻꐯꇯꄉꌠ《ꆈꌠꈍꎞ》ꈐꏭꆹꀑꐱꃅꉉꇬꌕꆱꃅꐙ:ꀨꆱꌠꆏ《ꈍꎞꈍꃼ》;ꐧꆱꌠꆏ《ꁱꋊꅺꊈ》;ꂪꆱꌠꆏ《ꑗꉘꁧꀿ》。ꊿꀑꁮꅺꐳꌠꆹꌕꑍꌕꉖꌧꇬꌧꀋꌐꑵꉬ。ꄚꐰꆏꋍꆱꋍꆱꃅꉉꀽꂿ:
ꆈꌠꉹꁌꆹ《ꈍꎞꈍꃼ》ꋌꑵꏯ“ꈍꎞ”、“ꈍꃽꉏꏢ”、“ꈍꎞꃨꆳ”、“ꈍꎞꇐꀳ”、“ꈍꌧꉐꏵ”ꃅꉉꌠꐥ。ꋋꆹꆈꌠꌺꇖꀊꄙꊰꉐꈎ、ꊰꉐꃘꊰꈎꃅꋍꋏꇈꋍꋏꃅꈌꈴꄻꐯꂘꅷꀃꑍꋍꄮꑟꌠꉬ。ꌌꌧꄮꇬꆏꊋꒉꌠꌧꐋꃤꅇꃼꇬꈴꄉꀱꑵꉬꐛꅹ“ꇬꇉꅇꁖꅇꉉꇁꌠ”ꉬꑴꄷ,ꀑꁮꅺꐳꈧꌠꆹꌧꄟꐯꀋꌡꇬꆏꃆꃀꌫꄟꑌꐯꀋꌡꑵꉬ,ꃆꃀꋍꊱꌠꄺꀱꌊꀉꑌꑵꃅꌧꉆ。ꑠꅹꇯꍝꃅ“ꄩꆹꏸꋦꌟꃅꄖ,ꀏꆹꏜꋦꌟꃅꑌ”;“ꎺꂯꄻꂯꉌꃀꋌꂸꅓ,ꅲꂯꇭꂯꅺꀧꋌꂸꅓ、ꊐꂯꄻꂯꇬꇉꋌꂸꅓ,ꁱꂯꄻꂯꄯꒉꎭꆱꋌꂸꅓ”;ꀋꌧꇬꀋꌧ,ꌧꇁꆹꃯꆏ,“ꁦꀑꉒꐩꌟꃅꐩ,ꈤꀒꆳꐩꌟꃅꐩ,ꇉꅶꒉꐩꌟꃅꐩ,ꏦꏪꑿꐩꌟꃅꐩ”;“ꀑꐎꋋꈨꈌꀧꉛ,ꀍꆈꋋꈨꎹꀕꇤ,ꏃꊰꋋꈨꅳꀨꄂ,ꉆꊰꋋꈨꅳꌜꀕ”ꑵꉬ。ꌌꑮꑟꅪꏷꅉꌧꇬꆏꊈꈯꌐꈜ、ꉌꃅꑓꌒ、ꇦꒆꂪꎑ、ꋬꂻꈨꅪꃆꂮꑠꀉꄂꌧꉆ;ꌌꆀꃅꊿꀘ、ꁍꃀꀿꃀꃀꐚꅉꇬꌧꇬꆏꆅꌈꈻꌈ、ꌦꐨꆅꈜ、ꉌꐒꇁꎭ、ꌟꆈꈓꊐꊊꊐꃆꂮꑠꀉꄂꌧꉆꑵꉬ。
《ꆈꌠꈍꎞ》ꋌꋐꈐꏭ《ꈍꎞꈍꃼ》ꈧꌠꆹꃆꃀꉐꂷꂴꊁꐯꅑꋽ,ꆏꄿꉠꄩꐂ,ꉢꀱꅽꄩꍅꃅꅲꌒꏣꃅꏣꀋꉆꑠꀉꄂꄉ,ꇯꍝꃅꌞꌧꅉꇬꑌꄉꅲꌠꀋꏯꐙꄉ,ꉜꅉꉜꅉꊿꋌꎼꉌꃀꌃꇗꄓ,ꇯꍝꃅ“ꁡꊭꏬꑣꌟꃅꑣ,ꅲꇢꃅꐈꌟꃅꐈ,ꄸꈣꀋꃀꃅꀜꌠꃅꀜ,ꐱꈬꃬꄵꌟꃅꄵ”ꌠꀋꏯꄯꒉꋐꌠꉜꀋꌐꌦꈐꇤꇫꎭꊊꀋꉂꃅꎍꌠꉬ。ꌌꆈꌠꌧꇐꂿꇐꎥꃪ、ꉜꅍꄻꅍꃅꇬꁌꇐꈤꌠꉬ。ꈐꏭꐩꋊꌧꇐ、ꉪꇐꏡꇐ、ꂘꇐꑴꇐ、ꃄꂓꊁꂓꌋꆀꁦꂓꇈꂓꑠꀑꁮꅺꐳꃆꂮꌐꀋꉆꃅꐊ,ꄚꉜꇬꆃꎭꆈꌠꐥꐨꐥꄸꈨꑌꊿꉜꇫꅐꇁꉆꌠꉬ。
《ꈍꎞꈍꃼ》ꋋꈨꆹꎰꆈꇂꃴꉹꁌꈬꇬꎹꈹꏓꄻꌊꁰꄻꐯꇯꄉꌠꉬ。《ꈍꎞꈍꃼ》ꌧꂓꅑꌠꀎꋏꌟꒉꐝꏪꃮꑌ(ꀋꐥꀐ)、ꊂꋊꉊꆽꌭꏹ、ꐎꀘꆿꉐꏤꏣꀋꑌꃅꃆꃀꉐꂷꈁꄽꌧꉪꇰꀐ。1987ꈓꆏꌧꍧꊿꋅꄯꒉꅏꅉꇬ《ꈍꎞ》ꋋꈨꅏꄻꄷꐛꅹ,ꋍꄮꇬꏓꈹꁰꄻꅷꀋꃋꋍꄮꑟꌠꉬ。《ꆈꌠꈍꎞ》ꋌꋐꄇꄜꋊꃅꍑꅐꇁꌠꆹ,ꆈꌠꐩꋊꍸꇐꁉꃑꀂꏽꅐꌞꑆꊋꇰꀋꃀꃅꐥꐘꉬ。
《ꁱꋊꅺꊈ》ꆏ《ꅺꊈ》ꌋꆀ《ꁱꋊ》(ꊿꋊ)ꑍꑵꐯꇯꄉꌠꉬ。《ꅺꊈ》ꆹꊋꒉꌠꐮꄹꐒꌌꐺꌠꇇꁱꏂꀨꐥꑵꉬ,《ꅺꊈ》ꆏ“ꅳꀨꌌꅲꄉꊉꐮꇰꌠꐩꋊꌧꇐꄜ”。ꐯꇯꀋꀮ、ꀋꃀ、ꌺꌕꑵꐥ。ꒉꆈꃅꄷꆹ《ꅺꊈ》ꀋꃀꑵꌠꁸꌊ《ꅔꐎꅺꊈꀦ》ꌋꆀ《ꏃꎹꅺꊈꀦ》ꑍꑵꃅꄉ。ꀋꃋꋊꍬꁭꄻꌊ《ꆈꌠꈍꎞ》ꈐꏭꇱꄉꋐꌠꆹ《ꏃꎹꅺꊈꀦ》ꑵꌠꉬ。ꂿꈬꐚꐎꃪꄧꐚꐎꀉꐞꀨꇈꌠꎭꂵꌅꃀꄰꅍꅐꇁꋐꌌꀨꃅꄉ,ꀉꁁꆃꎭꃅꄷꎹꌊꇁꌠꈬꋐꈯꄔꇬꑌꋍꈨꋊꍬꇬꇯꁰꄻꄉꌠꉬ。ꈐꏭꆏꀃꌋꀊꆨꃅꃴꃄꄅꁉ、ꃅꃴꃄꅉꄻ、ꐴꅑꉀꅿꌠꌋꆀꌦꑌꌗꑌꌠꅐꀨꅐꀿꃆꂮꑠꉉꀽꌠꉬ。ꂴꏭꉉꀽꌠꀋꏯꆀꋦꃅꄷꀑꐱꏲꄷꏓꈈꀉꒉꑠꈚꐛꀋꋻꐛꅹ,ꆀꋦꃅꈋꂱꑱꃄꁕꇬ《ꅺꊈ》ꊿꌌꐺꈧꌠꈐꏭꉉꄟꐯꀋꌡꄉ,ꌌꋍꈚꄉꌧꇬꆏꐯꀥꐮꑣꇬꎷꑵꉬ,ꑠꅹ《ꅺꊈ》ꌩꋴꐊꌠꉬꑴꄷ,ꀊꉘꌠꆗꑠꆏꌧꄮꇬꐯꀥꌊꐯꊨꐮꏈ、ꐯꅣꐮꇤꑠꐥ,ꋋꆹ“ꀀꀽꀋꊨ,ꐭꉙꀋꐊ”ꒉꄸ。
《ꏃꎹꅺꊈꀦ》ꈐꏭꃆꃀꉐꂷꈧꌠꁸꌊꀊꐎ、ꀈꋓ、ꀉꆈꌕꏠꃅꄉ。ꌌꑮꑟꅪꏷꅉꇬꌧꇬꆹꀊꐎꌠꀉꄂꌧꉆ,ꋌꀋꉬꑲꆏꃥꌋꄰꏸꇁꉆꌠꉬ。“ꍜꇰꀉꇐꃆꂮ”ꈧꌠꆏꀈꋓꌠ;“ꇰꇁꑳꒉꊰ”、“ꉭꁨꋦꆀꃅ”、“ꀊꑙꐩꍀ”ꌋꆀ“ꐧꈔꐧꈤ”ꃆꂮꈧꌠꆏꀉꆈꌠ。ꌌꆀꃅꊿꀘꅉꇬꌋꆀꁍꃀꀿꃀꃀꐚꅉꌧꇬꆹꉬꇮꌧꌐꉆꌠꉬ。
《ꆈꌠꈍꎞ》ꈐꏭ《ꁱꋊ》ꈧꌠꆹ“ꊿꋊ”ꁱꄉꌠꄜ,ꀉꁁꉉꇬ“ꊿꁬꎶꌠꋊꄜ”ꄷꌠꑌꐥ。《ꏃꎹꅺꊈꀦ》ꈐꏭꀃꌋꀊꆨꏃꇗꊇꄮꌺꒆꀿꀋꂿꅉ,ꏃꇗꊇꄮꌅꅪꏁꌋꒃꇈꌺꒆꀿꂿꉈꄉꌗꅸꈬꉻꐈꆀꍂꑟꌠꆏꋍꉐꑋꊏꃘꋊꐛ,《ꆈꌠꈍꎞ》ꈐꏭꁱꋊꈧꌠꆏꈬꉻꐈꆀꉇꄉꁱꅷꁧꌠꉬ。《ꁱꋊ》ꆹꂱꑱꋊꂱꑱꁱꄉꁨꌠꐥ,ꊋꒉꌠꈬꉻꐈꆀꉇꄉꁱꅷꇁꌠꀉꄂ,ꈬꉻꐈꆀꂾꃤꈧꌠꆏꏓꈹꁰꄻꐯꇯꄉꀉꑌꃅꀋꐥ。ꌌꋍꈚꄉꌧꇬꆏꈌꈴꄉꌧꑵꉬ。《ꁱꋊ》ꆹꀉꑌꑵꉬꄉ,ꁰꄻ《ꆈꌠꈍꎞ》ꇬꇱꄉꌠꆏꊿꋊꇬꊿꑫꋍꑵꌠꋍꐞꀉꄂꁱꇬꄀꄉꌠꉬ。ꊿꋊꆹꊋꒉꌠꂿꈬꌋꆀꋍꈭꇍꀀꌠꃤꉬ。
《ꆈꌠꈍꎞ》ꈐꏭ《ꏃꎹꅺꊈꀦ》ꇬꉜꇬꐧꋦꃰꊿꆹ,ꉇꆹꌿꁨꌺꇰꇖ;ꉇꆹꀊꑙꐩꍀꇖ;ꈏꆹꐧꃅꃵꃶꇚꊫꇖ;ꉇꆹꏃꇗꊇꄮꇖ;ꉇꆹꃱꇍꐈꀮꇖ;ꉇꆹꁍꉻꌺꌕꇖ;ꈏꆹꃰ、ꎔ、ꁮ、ꂾ、ꉒ、ꉾꃘꁯꌠꇖꉬꏭꐛ。ꋋꆹ“ꎰꆈꑿꈜ,ꌭꈈꄇꈜ”ꀋꏯꄇꃅꄇꇖꀕꃅꊨꄅꃱꉼꀐꌠꉬ!ꑠꅹ,《ꆈꌠꈍꎞ》ꈐꏭꊿꋊꉪꏓꈹꁰꄻꄉꈧꌠꆹꈬꉻꐈꆀꇬꄉꎭꅷꇁꌐ,ꋋꆹꐩꋊꀋꎪꐛꐨꌋꆀꐮꊒꀐꌠꉬ。
《ꅺꊈ》ꈍꑌꑵꌠꇬꉜꇬ,ꆈꌠꁍꁈꆹꀉꑌꃢꈤꆃꎭꃅꈋꃹꇁꋺꀐꐤꁮ。ꄷꀋꁧꁍꉻꌺꌕꆹꆃꎭꃅꈋꒉꏂꁨꈌꄉꈤꌠꉬꏭꐛ;ꈬꉻꐈꆀꋪꀕꁍꃴꄉꈤꇈꋍꑊꌺꇖꈧꌠꈐꏭꄹꁆꀉꄂꈤꀱꏿꆃꎭꃅꈋꃹꇁꌠꏭꐛ。ꋋꈨꈣꀱꏿꆃꎭꃹꀋꇁꌦꂾꆃꎭꃅꈋꋌꈚꇬꆈꌠꌋꆀꀉꁁꊿꋅꑠꀉꑌꃅꇬꀀꇈꀐꏭꐛ。ꋋꈨꈤꀱꏿꆃꎭꃹꇁꉇꆏꐯꌼꐮꉔꄉꐈꌌꈬꉻꐈꆀꐛꌐꌠꉬꏭꐛ。
ꐧꋦꐩꋊꈺꆹꎴꆹꀋꂿꊨꌠꈬꇬꄉꊿꋅꋋꈨꐯꌉꐮꆳ,ꐯꇏꐮꋠꅷꇁꇬꆏꀉꁁꊿꋅꑠꌉꈿꅉꄉꆈꌠꁮꌊꇁꇈꀊꉗꃅꐯꌼꐮꉔꅷꇁꇬꆏꐈꆈꌠꐛꁧꌠꑌꐊ,ꌉꈿꅉꇬꄉꌠꁮꌊꁧꌠꆈꌠꈧꌠꑌꐈꀉꁁꊿꋅꐛꁧꌠꐥ。ꆈꌠꇐꀳ“ꃺꈤꌅꂮꐛ,ꑌꈤꇓꐚꐛ”ꄷꑠꇬꐥ。ꐧꋦꐩꋊꂴꈻꊁꀋꌠꇬꄉꐧꋦꃰꊿꋋꈨꃸꁏꉆꆽꃅꐯꌼꐮꉔꄉꀻꎆꅷꇁꇬꆏ,ꀉꄉꋍꂷꌺꈧꌠꑌꀊꉗꃅꈤꅷꁧꇬꆏ,ꄹꁆꆏꀉꄉꌅꈌꌬꇈꅀꇇꇐꇇꆺꀉꇨꄉꌅꐛꁧ,ꌺꇖꀉꑌꄹꁆꌠꆏꀱꋍꇓꋍꐚꐛꁧꃅꐛꅹ,ꆀꃅꇖꈋꌅ、ꇓꐚꑠꑵꇫꐥꇈꌠꉬ。《ꏃꎹꅺꊈꀦ》ꇬꉉꇬꑌ“ꀒꋤ、ꆈꌠ、ꉌꈲꌕꁯꐯꇯꐧꃅꃵꃶꌺꉬꑴ”ꄷ。ꑠꅹ,ꍏꉸꊿꋅꀉꑌꄹꁆꌠꆹꉬꇮꋍꈚꄉꐞꇁꌐꌠꉬ。
《ꁱꋊ》ꋋꈨꑌꊋꒉꌠꈌꈴꄻꐯꂘꇈꑵꉬ。ꀉꑌꋊꃅꈌꈴꂘꅸꁧꇬꆏꊿꎺꏣꐯꀋꌡꄉꇢꊭꇬꋍꈨꋋꈨꊿꄝꆼꈘꅀꆹꑽꆽꀠꑠꐊꏭꐛ。ꀋꃋꉪꁱ《ꆈꌠꈍꎞ》ꈐꏭꇱꄉꈧꌠꉜꇬ,ꀃꌋꀊꆨꏃꇗꊇꄮꍂꇬꄉꌗꅸꀋꃋꊿꇫꐥꌠꇭꀧꇬꑟꌠꈬꉻꐈꆀꑍꁯꌠꋊꐯꀋꎵ。ꄹꁆꆏꋍꉐꈬꊰꋊꐛ;ꄹꁆꆏꋍꉐꃘꊰꋊꎖꀉꄂꐛ。ꋋꆹꐩꋊꀊꎴꇨꄉꇢꊭꇬꋍꈨꋋꈨꊿꄝꆼꈘꆘꅝꅀꆹꑽꆽꀠ,ꀋꉬꀐꇬꐝꅉꇬꊛꆹꑽꌠꉬꏭꐛ。
ꀋꃋꁰꄻ《ꆈꌠꈍꎞ》ꈐꏭꇱꄉꌠ《ꁱꋊ》ꈧꌠꑌꉪꊇꊋꃤꀄꊭ、ꇇꇐꀁꁧꇨꄉꆃꎭꃅꈋꅀꆀꋦꃅꄷꃅꏓꈹꐯꇯꈴꌐꀋꄐꑴꌦ,ꏓꈹꌌꁰꄻꄉꀐꈧꌠꑌꍤꆗꀋꈴꄉꐛꀋꒆꅀꆹꑽꆽꀠꑠꐊꑴꌦꄉꐯꀥꐮꑣꑠꐊꏭꐛ。ꄚ,ꈍꃅꉉꄿꂿ,ꉹꁌꈬꇬꀋꏯꂱꑲꋧꁧꃅꁱꄉꊾꂿꋍꑵꌌꐺꈧꌠꆹꏣꀋꋌꀐꌠ;ꌌꆈꌠꐩꋊꃆꂮꎥꃪꇬꑌꏂꀨꁌꇐꈤꌠꉬ。ꆈꌠꋊꏓꈹꁰꄻꎖꋪꌋꆀꏡꁈꉾꃪꑠꐘꑌꈭꀺꈜꀺꄉꀐꌠꉬ。
《ꑗꉘꁧꀿ》ꆹ《ꁧꀿ》ꌋꆀ《ꑗꉘ》ꑍꑵꄻꐯꇯꄉꌠ,ꋋꑌꄡꇗꎃꀕꌧꇐꈐꏭꈌꈴꃆꃀꑵꉬ。ꊿꉈꒉꎹꌠꆏꂱꊨꏦꁱꌊꄯꒉꏂꀨꃅꄉꌠꑌꐥ,ꄚ,ꊿꎺꏣꌋꆀꀑꁮꅺꐳꐨꐯꀋꌡꄉꏂꀨꋋꈨꑌꈐꏭꃆꃀꉐꂷꅑꐪꐯꀋꌡ。《ꑗꉘꁧꀿ》ꈐꏭꆏꋍꑞꋍꑵꁧꀿꈧꌠꄈꃷꁨꀉꑌꉻꃅꐙ,ꑗꉘꆹꌌꐯꁳꍜꇠꎻꑵꉬꄉꃷꁨꀊꅰꀉꑌꃅꀋꐥꑵꉬ。ꀎꋏꌟꒉꄹꇬ“ꑗꉘꃴꇉꀕ”ꌠꉬꄷ,ꌌꇯꍝꃅꌧꄮꇬꆏꀑꐱꂪꐱꃅꀉꄂꌧꑵ,ꄹꁆꉉꇬꑠꌧꀋꇮꄷꌠꇯꐥ。ꄚ,《ꆈꌠꈍꎞ》ꋌꋐꆹꆈꌠꐩꋊꆺꊂꇬꏂꀨꁱꇐꂓꅑꄷꀋꁧꄇꄜꋊꃅꍑꄻꄉꌠꀨꇊꀨꋐꌠꉬꄉ,ꑗꉘꃆꃀꉪꇬꎷꊌꄎꈧꌠꆏꉬꇮꇬꇯꄉꀐ。
ꆈꌠꐩꋊꆺꊂꇬꀃꌋꀊꆨꃀꏃꎹꀨꇬꆹ“ꌠꇩ”、“ꒉꆈꇩ”、“ꄀꇩ”ꌋꆀ“ꇂꍋꇩ”ꀋꏯꃅꄷꃅꏦꇩꏦꀄꊭꑠꐛꋺꑴꇬ,ꆀꋦꃅꈋꃅꀑꐱꏲꄷꏓꈈꀉꒉꈚꐛꀋꋺꄉ,ꆈꌠꌺꇖꈧꌠꐞꌊꂱꅉꀊꉗꃅꀀꅷꁧꇬꆏ“ꀀꀽꀋꊨ,ꐭꉙꀋꐊ”ꄉꌧꇐꁱꀕꍸꇐꇣꋲꐯꀋꌡꑠꀉꑌꃅꐥꁧꀐ。ꀊꐯꃅꉉꇬꒄꇂ(ꒊꆈ)、ꌧꍧ、ꇭꍏ、ꇨꑫꀀꌠꌧꇐꁱꀕꍸꇐꇣꋲꄷꀋꁧꊿꋋꈨꋋꂿꀋꋻꑠꌐꀋꉆ。ꀁꐯꃅꉉꇬꆃꎭꃅꈋꒉꆈ、ꌕꅔ、ꏃꎖ、ꀊꄙꌋꆀꇤꇉꀀꌠꌧꇐꁱꀕꍸꇖꇣꋲꄷꀋꁧꊿꋋꈨꋋꂿꀋꋻꑠꐥ。ꀋꃋꋋꇅꇬꎆꏣꇇꇐꌋꆀꊾꊋꊿꌗꑠꇬꀋꀙꄉꊿꋋꏓꈹꐯꇯꀋꄐꑴꌦ。ꇯꍝꃅ“ꑓꋪꂾꅉꑭꇇꇬꀋꑟ,ꅳꀨꑲꅉꇇꏸꇬꀋꑟ,ꉌꃀꉪꅉꐰꇑꇬꀋꑟ”;“ꉌꃀꁦꀑꉪ,ꐰꇑꁧꑭꊰ”ꃅꎍꑴꌦꌠꉬ。
《ꑗꉘꁧꀿ》ꈐꏭꋍꑞꋍꑵꁧꀿꃆꃀꈧꌠꆹꆃꎭꑭꊂꃤꐯꇯ,ꀑꐱꂪꐱꃅꐊꀐꑴꇬ,ꒉꆈꃅꄷꃤꄈꃷꁨꀉꑌꉻꃅꐙ。ꈐꏭꃆꃀꂒꆹꐯꌟꑴꇬꌧꏦꐯꀋꌡꈧꌠꆏꉬꇮꁱꇬꇯꄉ,ꅺꌡꇬ《ꑣꁧꑣꀿ》ꌋꆀ《ꃬꁧꃬꀿ》ꀋꏯꑠ。ꁧꀿꋋꈨꉜꇬꀊꅰꊿꋌꑅꃅꀋꐛꑴꇬ,ꋋꆹꊿꋅꌧꇐꍸꇐꇣꋲꑵꉬ。ꌌꆈꌠꐩꋊꆺꊂꇬꐥꐨꐥꄸ,ꉪꇐꏡꇐꌋꆀꌧꇐꑠꎥꃪꇬꂿꄐꀉꒉꃅꐥꌠꉬ。《ꑗꉘꁧꀿ》ꋋꈨꅇꂷꒃꋽ,ꅇꎔꉐꃨꑠꌐꀋꉆꃅꐊ。ꀋꄸꄷꑠꂿꀋꋻꈨꀋꋻꃅꉪꊂꋊꁳꉪꄉꉉꎻꇬꆹ,ꊿꋌꉪꋋꁱꇫꅐꇁꀋꄐꌠ,ꋋꆹꉪꆈꌠꐩꋊꇬꌧꇐꉬ。 《ꑗꉘꁧꀿ》ꇬꃆꃀꉐꂷꋋꈨꎹꈹꄮꇬꉹꁌꈬꇬꌧꒉꂾꒉꌠꀎꋏꈦꎖꃘꃀ,ꊂꋊꀉꄜꃅꑳꌋꆀꐞꎰꂷꑳꏤꏣꀋꑌꃅꃆꃀꉐꂷꈁꄽꌧꉪꇰꀐ,ꀘꂾꐎꀘꇓꍅꑌꈁꄽꉪꈽꎹꈹꈿꀐ。
ꆈꌠꐩꋊꆺꊂꇬ《ꆈꌠꈍꎞ》ꐊꈴꃅꏓꈹꐯꇯꄉꍑꌌꄯꒉꏂꀨꃅꄉꑠꋐꐥꀋꋻꑴꌦ。ꀋꃋ《ꆈꌠꈍꎞ》ꌧꏦꐊꈴꋌꋐꄇꄜꋊꃅꅐꇁꂯꄮꇬꆏ,ꉪꊇꆏꌧꍧꊿꋅꄯꒉꅏꅉ、ꉪꇇꀤꋺꌠꌧꒉꂿꒉꊈꌋꆀꄯꒉꋌꋐꉈꇬꑗꇬꌠꋍꏅꐋꀨꊈꏭꇗꅉꃅ,ꈀꎭꀕꀐ!ꉪꊇꌧꇐꀁꂥ、ꁰꄻꎖꋪꀋꇎꀋꂪ、ꄮꈉꑌꃛꏸꇨ,ꂿꃆꑌꀉꇖꇨꄉꁰꄻꌊꐛꀋꒆꅀꆹꑽꆽꀠꑠꐊꄡꑟ。ꌧꌠꂿꌠꌋꆀꉜꐋꋍꏅꌠꏣꀋꑌꃅꄜꌊꉪꇰꇁꅊꇈ,ꉪꊇꉌꊨꈬꇱꃅꋌꉚꄉꄺꀱꂠꀱꂿ。
《ꆈꌠꈍꎞ》ꁰꄻꋈꌠ
2002ꈓ7ꆪꁱꌐꌠ
2004ꈎ2ꆪꄺꀱꌠ
ꎹ ꀨ:
ꅇꌐꁌ
ꈍꎞꈍꃼ
ꋍ——ꑍꉏꌕꊰ
ꁱꋊꅺꊈ
ꃅꃴꃄꅉꋊ
ꃈꊭꋊ
ꃅꃴꃄꄅꁉ
ꃅꃴꃄꅉꄻ
ꐧꋉꈲꏿ
ꃰꎝꋊ
ꉭꁨꋦꆀꃅ
ꀊꑙꐩꍀ
ꍜꇰꀉꇐ
ꈧꁻꆪꁻ
ꈧꄂꆪꄂꇴ
ꇰꇁꑳꒉꄐ
ꉮꄵꐧꋉ
ꐧꈔꐧꈤ
ꀿꃼꀿꎹ
ꏃꃅꒊꊝꂋ
ꂽꄓꃝꄵ
ꌅꋦꁍꎹ
ꉒꐈꉾꐈꀥ
ꈬꉻꉇꄅꌺꈬꋊ
ꇂꏧꌺꌕꋊ
ꌠꈄꌺꌕꋊ
ꈬꉻꈐꄅꌺꈬꋊ
ꃅꈮꌺꈬꋊ
ꀍꃈꌺꈬꋊ
ꀊꋧꀈꆺꋊ
ꄹꀒꐈꇐꋊ
ꄹꀒꃅꃴꌺꉬꋊ
ꀋꂾꌺꈬꋊ
ꈴꊧꌺꌕꋊ
ꁉꆪꌺꉬꋊ
ꇤꇗꁌꄜꋊ
ꃴꁮꌺꌕꋊ
ꉒꁏꃅꃴꌺꌕꋊ
ꃅꃴꋒꒉꀋꃷꌺꑍꋊ
ꐚꂩꑿꀑꋊ
ꑷꈯꂸꉬꌺꑍꋊ
ꑿꀑꑾꄮꌦꅪꋊ
ꇌꂃꌺꉆꋊ
ꐚꂩꁨꉙꁡꉐꋊ
ꁡꉐꎬꊏꋊ
ꆃꈯꌺꏃꋊ
ꐚꂩꀋꇑꋊ
ꑗꉘꁧꀿ
ꋍꊱꌠ ꁧꐙꃅꌋ
ꑍꊱꌠ ꐦꐛꃅꌋ
ꌕꊱꌠ ꁧꇐꀿꇐ
ꇖꊱꌠ ꃜꇤꁧꀿ
ꉬꊱꌠ ꃝꁧꃝꀿ
ꃘꊱꌠ ꐎꂾꁧꀿ
ꏃꊱꌠ ꀎꇓꁧꀿ
ꉆꊱꌠ ꅻꊪꅻꃰꁧꀿ
ꈬꊱꌠ ꆸꎡꆼꇠꁧꀿ
ꊰꊱꌠ ꀍꃨꁧꀿ
ꊯꊪꊱꌠ ꀑꊫꁧꀿ
ꊰꑋꊱꌠ ꃝꉐꁧꀿ
ꊯꌕꊱꌠ ꑲꌺꁧꀿ
ꊯꇖꊱꌠ ꀑꑌꁧꀿ
ꊯꉬꊱꌠ ꇱꃏꁧꀿ
ꊰꃘꊱꌠ ꄔꁧꄔꀿ
ꊰꏁꊱꌠ ꊝꁧꊝꀿ
ꊰꉆꊱꌠ ꃬꁧꃬꀿ(ꋍ)
ꊯꈬꊱꌠ ꃬꁧꃬꀿ(ꑍ)
ꑍꊏꊱꌠ ꑿꁧꑿꀿ
ꑍꊏꋋꊱꌠ ꃅꁧꃅꀿ
ꑍꊏꑋꊱꌠ ꎧꁧꎧꀿ
ꑍꊎꌕꊱꌠ ꋂꁧꋂꀿ
ꑍꊎꇖꊱꌠ ꈾꁧꈾꀿ
ꑍꊎꉬꊱꌠ ꇌꁧꇌꀿ
ꑍꊏꃘꊱꌠ ꊴꁧꊴꀿ
ꑍꊏꏁꊱꌠ ꈌꁧꈌꀿ
ꑍꊏꉆꊱꌠ ꍶꁧꍶꀿ
ꑍꊎꈬꊱꌠ ꉛꁧꉛꀿ
ꌕꊰꊱꌠ ꀀꁧꀀꀿ
ꌕꊰꋋꊱꌠ ꍯꁧꍯꀿ
ꌕꊰꑋꊱꌠ ꎆꁧꎆꀿ
ꌕꊯꌕꊱꌠ ꒉꁧꒉꀿ
ꌕꊯꇖꊱꌠ ꃈꊭꁧꀿ
ꌕꊯꉬꊱꌠ ꎺꁧꎺꀿ
ꌕꊰꃘꊱꌠ ꑷꂿꁧꀿ
ꌕꊰꏁꊱꌠ ꇓꁧꇓꀿ
ꌕꊰꉆꊱꌠ ꏦꈜꁧꀿ
ꌕꊯꈬꊱꌠ ꀉꉌꁧꀿ
ꇖꊰꊱꌠ ꐚꁧꐚꀿ
ꇖꊰꋋꊱꌠ ꆳꁧꆳꀿ
ꇖꊰꑋꊱꌠ ꃱꁧꃱꀿ
ꇖꊯꌕꊱꌠ ꃰꃅꁧꀿ
ꇖꊯꇖꊱꌠ ꑸꏓꁧꀿ
ꇖꊯꉬꊱꌠ ꌅꁧꌅꀿ
ꇖꊰꃘꊱꌠ ꏂꅪꇇꌒꁧꀿ
ꇖꊰꏁꊱꌠ ꌦꌺꁧꀿ
ꇖꊰꉆꊱꌠ ꀘꁧꀘꀿ
ꇖꊯꈬꊱꌠ ꑊꁧꑊꀿ
ꉬꊰꊱꌠ ꏲꁧꏲꀿ
ꉬꊰꋋꊱꌠ ꃼꁧꃼꀿ
ꉬꊰꑋꊱꌠ ꑊꋌꁧꀿ
ꉬꊯꌕꊱꌠ ꌦꁧꆅꀿ
ꉬꊯꇖꊱꌠ ꉗꇉꄏꁧꀿ
ꉬꊯꉬꊱꌠ ꀈꈬꉙꁧꀿ
ꉬꊰꃘꊱꌠ ꇫꈘꐋꁧꀿ
ꉬꊰꏁꊱꌠ ꂷꁧꂷꀿ
ꉬꊰꉆꊱꌠ ꐩꁧꐩꀿ
ꉬꊯꈬꊱꌠ ꑳꁧꑳꀿ
ꃘꊰꊱꌠ ꑣꁧꑣꀿ(ꋍ)
ꃘꊰꋋꊱꌠ ꑣꁧꑣꀿ(ꑍ)
ꃘꊰꑋꊱꌠ ꐳꐎꁧꀿ
ꃘꊯꌕꊱꌠ ꉹꁧꉹꀿ
ꃘꊯꇖꊱꌠ ꉾꁧꉾꀿ
ꃘꊯꉬꊱꌠ ꑱꃀꁧꀿ
ꃘꊰꃘꊱꌠ ꑗꉘꃴꌠ
ꃘꊰꏁꊱꌠ ꃀꌺ
ꃘꊰꉆꊱꌠ ꒉꐪꒉꐛ
ꃘꊯꈬꊱꌠ ꁧꐙꒉꌠ
ꏃꊰꊱꌠ ꈻꐪꈻꐛ
ꏃꊰꋋꊱꌠ ꉷꃅꌤꃚ
ꆀꃅꇤꇉꒉꌠ
ꏃꊰꑋꊱꌠ ꃢꌬꐰꇑ
ꏃꊯꌕꊱꌠ ꐯꈽꋦꌠ
ꏃꊯꇖꊱꌠ ꆀꒌ
ꏃꊯꉬꊱꌠ ꏸꃆꏸꂮ
ꏃꊰꃘꊱꌠ ꌋꐪꌋꐛ
ꏃꊰꏁꊱꌠ ꊽꉿꉬꐨ
ꏃꊰꉆꊱꌠ ꀋꉉꃆꂮ
ꏃꊯꈬꊱꌠ ꀋꃀꂓ
ꉆꊰꊱꌠ ꐧꒆꌺ
ꉆꊰꋋꊱꌠ ꌺꒆꀦꌠ
ꉆꊰꑋꊱꌠ ꅐꐪꅐꐛ
ꉆꊯꌕꊱꌠ ꏂꃅꏂꌠ
ꉆꊯꇖꊱꌠ ꏮꉈꄀꌠ
ꉆꊯꉬꊱꌠ ꍝꅇꇠꅇ(ꋍ)
ꉆꊰꃘꊱꌠ ꍝꅇꇠꅇ(ꑍ)
ꁱꌐꊂꅇ
发布时间：2014-10-13