ꐙꈌꐎꑳ：ꁧꐙꀊꋨꁆꏯ(ꉈ꒔ꎴ)
【ꁧꐙꀊꋨꁆꏯ】
ꁧꐙꀊꋨꁆꏯꁦꄅꄖ
ꁦꄅꇈꄅꌕꄅꇖꄅꄖ
ꈀꄸꄳꏤꀉꑳꉬꐙꐚ
ꇿꅉꐁꅉꈿ꒰ꃨꋒꅾꅉꏮ
ꌷꎹꌷꈹꄮꇬꐣꁙꀵ
ꁮꅉꈍꑋꌀꇗꈐꏭꀀꀋꐚ
ꁧꐙꀊꋨꁆꏯꒉꎔꒉ
ꒉꎔꅶꁉꉡꒆꉡꉘꅉ
ꈀꄸꄳꏤꀊꐔꉬꐙꐚ
ꐚꍝꐙꃰꑌꇁꑿꆫꁍꇬꏮ
ꄇꉼꋴꅪꁧꈿꇉꈽꅪ
ꉌ꒜ꈐꏭꈀꄸꈀꄸꉂꀋꐚ
ꁧꐙꀊꋨꁆꏯ
ꀊꉘꄮꐰꃮꆫꇌꆫ
ꇢꇑꋛꋚꄁꅉꀊꄶꐛꑴꌦ
ꋚꅒꋙꋠꀿꇁ
꒜ꐮꏮꌠꎺꇊꐝꄧꀕꇬꎷ
ꁧꐙꀊꋨꁆꏯ
ꇤꈏꇢꇑꊷꆣꀕꃅꀊꄶꋦꑴꌦ
ꀉꂿ꒿ꇁꂘꅇꇤꈫꇤꇋꎍꑴꌦ
ꁧꐙꀊꋨꁆꏯ
ꁮꅉꌧꅉꊛꅉꌧꌐꇁꀋꉆ
ꉂꏣꁦꅉꀿꅉꌧꈤꇁꀋꄐ
ꀒ，ꁧꐙꀊꋨꁆꏯ
【ꆈꌠꃭꇁ】
ꀉꂿꑱꍹꈵꃴꑋꑌꌦꀋꐚ
ꂿꃅꈊꅉꇀꅉꑟꀐꂼ
ꀉꂿꇆ
ꁍꁈꁮꅉꆎꍹꇬꇯꇮꑴꂼ
ꁍ꒜ꇇꊂꆎꍹꇬꇯꇮꑴꂼ
ꅫ꒜ꀈ꒧ꎭꁮꎭꃹ
ꎭꋩꎭꑟꃅꃴꌋꀕꏣ
ꐥꐨꁮꅉꋌꈻꃭꇁꑱꀱꄻ
ꀄꂼꎔꀕꋌꋩꃭꇁꑱꀱꐛ
ꀉꂿꑱꍹꑱꀱꆏꒉꉢꇁꐛꑿꈴꃅꈴ
ꆈꌠꃭꇁꇆ
ꉢꈚꉓꅉꅞꅉꐩꋊꈝ꒜ꑌꍬꋺ
ꐩꋊꈝ꒜ꈛꆹꎴꅊꇈ
ꉢꈚꐙꃰꐚꆗꁍꁈꑭꐨꑌꎹꋺ
ꁍꁈꑭꐨꎹꅉꎳꅉꑟꇬꎷ
꒰ꆨꄮꇬ，ꉢꈚ
ꃰꐻꉈꐻꄡꄉꇭꀧꊷꆣꀕꑌꋻ
ꈣꅐꄹꉇ，ꉢꈚ
ꃆꇭꃅꃨꋩꄉꉌ꒜ꈐꇿꑌꏿꋺ
ꂁꄉꍃꄉꆀꃅꉂꏣꎹꄮꇬ
ꁧꐧꈿ꒰ꋌꈷꃨꋒꅿꌠ
ꃭꇁꇂꃴꁀꁻꈀꄸꈷꌠꉬꀋꐚ
ꆧꁨꊛꑭꋌꂢꐝꇉꀕꌠ
ꃭꇁꇂꃴꉼꉹꈀꄸꂢꌠꉬꀋꐚ
ꉘꃅꉘꀋꇉꌠꆏ
ꉠꁮꅉꆹꄡꇗꅽꁮꅉ
ꅽꉂꏣꑌꄡꇗꉠꉂꏣꐛꅊꇈ
