倮伍伟哲彝文诗歌：布谷鸟（外一首）

布谷鸟（描写亲情，乡情）
ꅇꏮꇪꀮ
 
ꑌꅐꑋꈌꁏꇁꃲ

ꑋꈌꉙꐞꐞꇁꃲ
ꅫꇁꌱꃀꀿꐥꀿꃅꈺꇯꃲ
ꆀꇀꉶꌺꑳꋦꑳꇬꈺꇯꃯ
ꀊꍆꅐꋑꑌꌩꉅꈌꏓꃙ
ꇌꎶꃘꑸꑌꆫꄓꂾꄑꊸ

ꆺꑳꀉꄉꑞ
ꃺꐞꑌꐞꃺꑌꈬꉐꐞꁧꃲ
ꊈꐞꌐꐞꌐꌺꄙꇬꐞꁧꃲ
ꌺꐞꇖꐞꇢꇑꌺꍸꐞꁧꃲ

ꇪꀮꇆꇪꀮꆏꂷꋍꈓꇈ꒔ꃢ
ꂾꃚꐞꄦꄧꉌ꒜ꈶꍟꍠ
ꏃꇁꃅꃴꏯꆺꑳꀉꄉꆹꐥꌒꌑ
ꊂꇁꋍꈓꅇꏮꇁꅊꇈ
 

竹林（描写爱情，封建婚姻拆分的恋人）
ꂶꏪ

ꉪꏤꑳꉎꏫ
ꂶꏪꋍꂷꐛ
ꂶꁧꇪꑐꑐ
ꂶꏾꃴꊰꊰ
ꂷꑭꇂꃴꁬꇁꇓꌺꆏꃨꉢꃨꂅ
ꂷꑭꆹꈈꉌꊭꉌꇓꆏꉙꉢꉘꋑ

ꀄꊭꃅꋍꑍ
ꀊꌱꉣꑊꎆꆱꄚꇬꏪ
ꁬꃨꆰꃨꉢꑣꆏꁴꃅ
ꃀꃀꋀꆦꆏꈹꉢꄎꃅ
ꉒꏂꑣꌋꏤꏅꏿꃅꄷ
ꆲ꒰ꈹꌌꃆꇭꋨꃅꄷ
 
ꄿꏀꄮꋍꑍ
ꀊꌱꉣꑊꌩꏓꂷꋐꂶꏪꑞ
ꇁꌊꂷꑭꇂꃴꑌ
ꂷꀑꉌꊭꉂꅇꑟꅅꉙ
ꂷꑭꁬꃨꃨꈍꈍ
ꐪꆮꉢꂢꆏꇰꃅ
ꉼꉷꆏꂢꉢꇰꃅ
ꀍꆈꋍꍂꐯꇰꐥꃅꄸ
ꀑꐎꑍꍂꐯꇰꐥꃅꄸ

ꊂꇁꋍꑍꉢꀱꉈꏭꌧꇐꌷꁧ
ꀊꌱꉢꏁꉢꎭꂶꏪꑟ
ꉂꃢꉂꈚꏂꆨꀋꀨꌠꃅꊸꃅꄷ
ꉂꋚꉂꒉꃮꆪꐻꐎꌟꃅꋠꃅꄸ
ꉂꅇꑟꅅꆀꃅꎧꏸꌟꃅꅝꃅꄸ

ꀃꑍꋌꄮꉢꀱꀁꇬꑟ
ꇁꌊꂶꏪꑟ
ꂶꀑꍑꅑꍑꊰꀑ
ꂷꐧꆳꁏꆳꌸꃳ
ꂷꑭꁬꋦꃨꊰꀑ
ꂷꑭꆸꈈꇓꎍꄅꁨꃳ
ꀊꌱꊿꑮꃅꄩꅫ
ꁧꅉꎴꅉꑟ
 
ꉠꑠꑟꂷꑌ ꏮꇆꂷꏪꉜ
ꉌꃀꍠꍠꁏꑓꁴꇬꇉꑌ
ꀋꇷꇉꀋꇷꃝꐨꀊꆹꀋꇷꋠ
ꃝꏣꎆꌋꈤꌠꀋꇷꋠ

作者: ꇉꃶꃤꎆ，倮伍伟哲（汉名：伍宁江）