“ꌉꈿꁻꏤꌅꂮꀈꏸꁧꇁꌠ，ꃆꉉꑘꉉꃀꈌꅡꎨꁧꇁꌠ，ꑮꑟꅪꏷꏃꇖꊇꄮꁧꇁꌠ，ꈎꏅꆪꆘꀑꀮꈆꌒꁧꇁꌠ，ꑲꋉꇣꄉꁯꇑꌺꍸꁧꇁꌠ......” “ꊿꂷꑳꂷꁨ,ꃮꂷꉻꂷꁨ”。ꊿꂷꇬꐥꌦꍂ，ꑳꌋꆀꐮꐞꀋꉆꌠ，ꇬꄉꉜꎼꇁꇬ，ꆈꌠꆹꃀꏣꐧꋦꇬꁯꇑꌺꍸꋦꄮꄑ，ꑲꋉꇣꄉꀀꑲꌧ，ꑲꋉꇮꇐꑌꄚꄉꑭꄒꌠꉬ。
ꀃꌋꀊꆨꃅꄉꇬ，ꆈꌠꑳꆹꏜꑳ、ꎤꑳꁐꑳ、ꊖꁌꀻꑳ、ꌩꊨꑷꂿ、ꉅꇓꑳ、ꇓꂵꑳ……ꑠꀉꑌꑵꃅꐥ。ꋌꆹꌣꈚꌢꎭꌋꆀꈒꊋꐥꀋꐥꍣ，ꐵꑳꐵꀋꑳꌠꑌꍣꌠ。ꎆꐥꋚꐥꇇꇐꊌꌠꆏꑷꂿꉾꃪꌠꋉꄉꀀ，ꌢꎭꊌꀋꄿꃃꃔꌠꆏꏜꑳ、ꁐꑳꎤꑳꑠꋉꄉꀀ。ꀋꃋꀃꑍꋋꄮꆏ，ꎹꉼꍗꑴꍔꊱꇗꅉꃪꄉ，ꌢꎭꏜꑳꀀꌠ，ꊌꀋꄿꎤꑳ、ꁐꑳꀀꌠ、ꊖꁌꑳꀻꑳꉬꇮꐈꇁꑷꂿꇊꃓꐛ。ꊻꂷꉜꄉꑳꋉꁵ,ꀨꇖꀨꄅꀀꌐꈤꀋꉆ，ꀏꄩꑍꊐꌕꊐꐛꌠꐥ, ꀮꄉꅉꀮꄉ，ꇐꄉꅉꇐꄉ，ꋚꃅꅉꋚꃅ，ꅊꁧꒉꅉꑌꄻꄉ，ꊿꀀꅉꊿꀀ，ꃥꋩꅉꃥꋩ，ꀋꀀꉈꉩꀕ。ꉹꁌꅾꅇꂷꃅꉉꇬꆹ：“ꇭꍣꄉꌟꒉꏲꌋꆹꊾꀿꊾꃀꏭꀋꋌ，ꏓꂱꀉꁌꑠꑷꀋꄿꄷꀋꉆ！”ꀊꆨꎆꉻꍈꀋꒊꍈꀀꄉꃅꋆꈠꆺꀨ，ꃅꑌꉐꋹꄡꌠꇿꄻꇬꎺꂯ?ꀋꃋꄚꐰꁱꊿꆏꎺꏣꐊꆈꌠꀀꑳꋈꄻꀻꎆꅷꇁꌠꐩꋊꑭꁘꍈꊼꇅꃺꄉꌧ。
ꋍ、ꏜꑳ
ꏜꑳꆹꐩꋊꀊꎳꐯꀊꎳꀐꌠꀀꑳꑵ。ꑲꉻꆹꊖꁌꉬꇬꐥ，ꎤꈭꌌꄉꈭꄉꌠꉬꇬꐥ。ꄩꄵꄉꌠꆏꁬꏜꀊꅰꍹꐛꆰꀿꀋꄎꌠꀠꏜꇇꏸꃛꌠꋐꌋ，ꈍꑌꄄꃅꄵꄉꈭꐨꆏ，ꋍꄩꆏꊖꑘꃬꄚꍑꄉ，ꑠꀋꉬꑲꆏꃅꆳꁏꌊꇨꈴꁧꌠ。
ꏜꑳꀉꑌꌠꆹꑲꅐꀊꏀꌠꀀ，ꌺꀉꑌꌠꑲꈓꆏ，ꀿꃀꈧꌠꊿꂿꑳꂷꋉꀉꑳꈧꌠꏀꀋꄎꇬꆏ，ꌺꑮꃀꑮꇈꑲꈻꇁꇬꆏ，ꃃꃓꄉꏜꑳꍈꋉꇬꏀꄉ，ꊂꋍꑍꌠꏀꃌꒆꋋꑍꂷꄿꄮꇬꑴꆀ，ꊨꏦꈯꄿꉘꇉꄉꑳꉾꌠꋉꄉꀀ。ꐵꑳꊭꏡꄎꏣꀋꄿ，ꈒꊋꀋꄿꌠꆹꀉꑳꌕꑻꉬꀐꇬꂯꏜꑳꀀꅷꐺꌠꑌꐥ。
ꄚ，ꏜꑳꀉꑌꌠꆹꆫꑳ、ꐏꑳ、ꎆꉻꉬꌐ。ꀋꉊꁌꄝꊂꆏ，ꊿꏜꑳꀀꌠꀀꑌꃅꐙ。ꀃꑍꋋꄮꆫꇁꈩꅉꆹꉈꀕꃅꏜꑳꋉꀊꄶꅞꄉ，ꊿꇬꈧꑬꆏ、ꆿꒉꅝ、ꋚꋠꅉꄻꄉ。ꀊꆨꎭꃤꃴꇉꀕꌠꀃꑍꎺꏣꊷꆣꀕꌠꐛ，ꈜꀕꇉꊂꋊꌺꇖꌌꄉꁮꅉꅺꊈꐛ。ꃅꋊꐛꐈ、ꐧꋦꀻꎆꏦꏪꇓꂃꄓꄮ，ꀎꋏꏜꑳꊿꌌꁌꒉꄣꅶꃅꄻꎳꄉ，ꄇꉬꀕꃅꀊꄶꋦ，“ꏂꆨꈻꐪꎺꄉ,ꃮꆪꊸꐨꉂ”，ꄚꇬꄉꀊꆨꎭꃤꇔꌠꊫꌐꍈꐛ。
ꑍ、ꎤꑳꁐꑳ
ꎤꑳꁐꑳꆹ，ꑲꉻꌋꆀꑳꄩꄵꄉꌠꃅꉬꇮꂷꉬꌐ。ꎤꈭꃅꑳꑭꇊ，ꁐꏪꃅꑳꄩꄵ。ꁐꐎꑳꁭꁉꄷꑠꇬꐥ，ꋌꆹꑳꀃꈈꇬꀋꈴꃅ，ꑳꁭꁉꄉꑷꈓꃹꌠꄜ。ꁐꏪꂶꏪꄵꄉꌠꑳꆏ，ꑋꊂꂾꌕꆪ，ꃬꆪꌋꈤꊪꄮꆏ，ꁐꏪꆳꌌꁧ，ꎤꑭꆳꁏꇨꎭꄉ，ꑘꃅꃤꑽꈻꇁꌠꊿꆏ，ꐙꄏꑭꆏꀋꄞꃅꑳꄻꇤꂝꄻꅐ。
ꎤꆹꀉꑌꌠꌿꋦꁧꑏꇉꅷꈯꊂꂷꏂꅀꂷꄩꋐꌊꃅ，ꊿꃅꉔꌠꋍꑍꋍꁬꃅꌐꄏ。ꇇꀋꐳꌠꆹꈫꁁꀊꄁꃅꄎ，ꇉꅸꃀꑌꂷꌌꃅꇬꆏꃅꌒꑴꇬꌬꀋꐕꄉ，ꊿꇬꀋꋐꑟꃅ。
ꎤꑳꋉꇬꆏꉾꐨꆏ，ꊾꊋꀉꑌꃅꃹꄻꀋꅐ，ꄮꈉꀊꎳꃅꈁꄻꀋꅐ，ꇨꊸꄉꄻꅐꇁꄎ。ꋌꑌꄡꇗꑲꅐꀊꏀꌠꄻꄉꀀꑟꃅ。
ꀋꉾꌠꆏ，ꆳꄡꀋꄎ，ꎤꑳꃅꆳꈜ，ꑑꃹꏾꀵꀕ。ꀉꑌꌠꅙꁧꒇꌋꄻꎤꑭꋍꄉꑴꇬꆐꀋꉬ，ꄡꇗꎰꆳꉼꄹꁏꄮꈠꆺꈺꄖꀕ。ꉇꆏꅇꉉꂾꃚꇢꊭꄀꀋꄎ，ꑷꈓꉉꌠꉈꏭꈨ，ꉈꏭꉉꌠꀀꇬꈨ。ꑠꃅꄉ，ꌠꏀꑲꋦꀊꏀꈧꌠ，ꈐꅅꑭꅇ，ꉂꅇꑠꅇꍈꄜꂯꇬ，ꂴꉈꏭꊼꇅꌋꃬꇈ，ꊿꇬꀋꐥꏭꐛꇬꑲꆀꌧꀬ。ꀊꑳꌺꅉꀋꐛꌧꅍꀋꐥꈧꌠꆹ，ꆈꑮꑟꀊꉗꀋꐛꌦꌠꑲꋦꀊꏀꎤꑳꁐꑳꑭꄉꌞꑲꅲ，ꌠꏀꈨꌠꐮꃈꐯꑐ、ꉂꅇꑟꅅꌧꌠꈨꄮ，ꋰꀋꄎꃅꈎꀕꄷꒉꁖꄉ，ꊿꒃꅜꄉ，ꊿꌌꎹꇨꁠꌠꑌꐥ。ꌠꏀꈧꌠꑌ，ꆏꄑꉠꑲꅲ，ꆏꄑꉠꑲꅲꃅꄉ，ꊁꄹꉇꆏ，ꅇꋌꈧꌌꐯꒊꈩ。ꌓꀖꀋꐕ，ꒊꇐꀖꀋꐕꌠꆹꇨꃃꄉꃣꈌꅐꌠꐥ。ꑠꂷꄉ，ꉹꁌꅇꃅꉈꇬꆹ，ꎤꑭꅺꀧꅑ,ꃄꈌꄐꃅꅇꄡꉉꄷ，ꎤꑳꁐꑳꆹꉲꅐꀋꁧꑖꃅꁈꋍꇬꀀꌠꉬꄷ。
ꀃꑍꋋꄮꁐꑳꎤꑳꆹꈬꉘꃅꈋ，ꆈꃅꆸꈈꑮꃀꑭꄮ，ꑮꃀꑲꌺꍈꄻꇬꑵ，ꑠꄮꇬꀊꄁꊿꂾꇁ。ꋌꆹꈝꐮꃅꁐꁬꄻꄩꄵ，ꎤꁬꄻꀏꇊꄉ，ꑲꌺꆏꄻꌩꋚꇓꂷꋠꇐꁧꇂꃴꋉꄉ，ꑮꃀꀊꏀꑟꇁꄮꆏꋩꄚꑌꄉ。ꑮꃀꑿꇁꈪꌐꇬꑲꆀꑳꃀꇤꂾꀁꁈꀉꁧꄰꑳꇬꃹꆹꑟꃅ。ꄚ，ꎤꃅꁐꃅꇮꌠꆹꐤꄿꀁꑌꒉ，ꀊꉗꀋꈁꇬꆏ，ꁐꑳꎤꑳꑌꄮꈉꐊꄉꑍꁧꂯꏭꐛ。
ꌕ、ꊖꁌꀻꑳ
ꃶꐚꃅꉉꇬꆏ，ꊖꁌꑳꌋꆀꀻꑳꆹꋍꑵꉬꌠ。ꋌꆹꄩꇮꌠꆏꀻ，ꑳꉻꆏꊖꁌꉬꌠ。ꆃꎭꃅꈋꎭꇔꈚꏂ“ꄩꀻꇫꏠ”ꍔꊱꇗꅉꀋꇁꌦꂾꆹ，ꆈꌠꀉꑌꌠꊖꁌꑳꀻꄵꄉꌠꀀꌐꌠ。ꊂꍔꊱꇁꈭꐨꆏ，ꍔꃚꑳꏀꋉꉪꏀꄉ，ꑳꆹꊖꁌꀻꄵꄉꌠꆏꐆꇨꎭꌐꀐ。ꈨꏀꇬꄉꉢꈨꇬ，ꆃꎭꑭꊂꀻꑳꁡꇤꄽꂪꂶꌠ，ꐱꇁꀮꄮꀋꁯꇉꉱꋁꑌ2017ꈎꆏꎭꄏꍔꊱꇂꃴꄉ，ꉬꇮꐆꇨꎭꌐꀐꄷꈨ,ꋌꆹꉾꐘꑌꉬꑴꇬ,ꐩꋊꎺꏣꑌꄚꐊꁮꑋꀐꌠ。
ꊖꁌꀻꑳꂷꋉꇬꄏꏤꄮꄉꋉꐯꄀꄮꑟꇬ，ꀁꉘꃅꌗꇬꑌꃅꐑꋍꈎꈭꏝꂷꈁ。
ꂴꋍꁘꌠꆏ，ꇈꈬꀻꈌꁧꄻꅐ。ꀻꈌꌠꆹꃅꎸꄮꐰꈒꑌꊋꅑꌠꌺꃰꄿꏀ，ꎵꃀꈾꃀ、ꀀꃛꑸꑽꀵꄉ，ꇁꌊꌿꋦꁧꑐꍆꄉꌕꑍꇖꑍꃅꑘꄉꈌꁧꌠ。ꏣꑟꃷꇎꐮꐊꄉꈌꁧꌠꐥ，ꀋꁧꀉꌺꐮꐊꈌꁧꌠ，ꃺꃶꀁꑳꐮꐊꁧꌠꐥ。ꇈꈬꀻꈌꁧꄎꌠꑲꆀꌺꂷꌗꉆꄷꄉ，ꆈꌠꁡꇤꌺꃰꀉꑌꌠꀻꈌꋺ，ꀻꈌꇮꑟꃅ。
ꇁꌋꁧꄩꑟꇁꊂ，ꂴꆏꈝꐯꌠꂷꑳꍈꋉꄉ，ꌩꇷꀊꃶꍈꉅꄉꌌꃅꄔꏦꇬ、ꋚꃅ、ꑋꁮꉆꁮꇷ。ꈭꐨꆏꀻꈌꉆꌠꌿꁧꎹ，ꋋꆹꎵꃼꀋꅑ、ꎂꑐꃅꐙꇈꊨꂷꀁꑌꇬꅑꄉ，ꀣꈜꁮꑠꑲꆀꀻꈌꉆ，ꈌꑌꈌꌒ，ꈍꐮꌠꉌꃹꈍꐮꌠꐛꉆ。ꑠꀋꉬꑲꆏ，ꀈꈥꃅꌩꁄꇬꆹ，ꊾꊋꃹꑘꀋꅐꌠ。“ꂘꀕꌺꀋꐛ，ꋩꀻꒉꀋꈜ”ꄷꄉ，ꀻꆹꋩꏦꀋꐥꌠ，ꈌꎼꇁꇈꍠꃅꂱꄷꒉꑟꃅ。
ꈌꌐꈭꐨꇤꃅꊸꈍꑋꑍꆗꈭꐨꆏ，ꎞꃪꑳꌩꁧꀉꒉꌠꇂꃴꄉ。ꈍꑌꁮꆪꌗꈻꄉ，ꀻꇬꒉꈧꌠꆗꀊꃶꄮꆏ，ꃷꇎꁡꇤꊿꊂꎭꌊꀻꒃꁧ。ꉪꏤꃅꈌꆹꑋꈌꄮꐰꂶꌠꇬꆏꀻꒃꑠꃅ。ꐮꊂꎭꌠꆹ，ꊿꁯꏤꈒꑌꊋꅑꑠꂷꆹꀋꆹꀋꉆꌠ，ꀋꄸꄷꆏꀉꑳꌋꆀꀋꃋꌺꑠꁆꌌꌞꊂꎭꒉꇬꆹ，ꌟꆈꄰꈂꀸꁱꀋꐭꑴꇬ，ꉌꂵꈐꄸꀋꈴꌠ。ꇨꊨꏣꑟꈧꌠꆹꀁꇬꈁꐥꌠꃅꇤꄉꇇꀨꀻꒃꁧ。ꑠꃅꄉ，ꆈꃅꆸꈈꆏꄑꉠꇇꀨꌠꉾꃪꃅꇏꑌꄚꄉꄜꋊ。ꋋꄮꇬꀻꆏꑾꌙꄉꀉꑌꃅꀵꄎ。ꄮꈉꋋꊭꆹꊌꐛ、ꂷꃃ、ꀉꁌꃱꋯ、ꂥꅐꊭꌠꉬꄉ，ꊾꊂꎭꇈꀱꇁꌠꀉꄉꀉꂿꆹꊌꐛ、ꂷꃃ、ꀉꁌꃱꋯꑠꈻꌌꉪꍈꇁ，ꉇꆏꊂꎭꌟꆈꏤꄔꃛꄻ，ꃮꌉꀻꒃꌠꍈꄉ，ꉪꎼꄚꋙꒌ，ꉌꇿꋍꉎꀋꐥ。ꀿꃀꋍꈨꆹꇈꈬꉏꊭꃀꂪꄵꄉ，ꎼ、ꉐ、ꈦꑠꄵꌊꇁ，ꉪꑌꄚꐊꐂꅉꃅꉏꊭꈩ，ꀋꃋꆸꈐꎺꇊꐝꄧꀕꑴꌦ。
ꊖꁌꄃꇬꆏ，ꊖꌐꇔꇷꂷꈁ，ꊖꏦꇷꈁ，ꊖꐔꀵꌠꊿꀉꑌꃅꈁ，ꊖꏪꌠꑍꂷꈁ。ꊖꑘꈛꑌꅉꇬꊨꑲꆏ，ꊿꀁꑌꇬꑌ，ꄃꌋꈜꐳ，ꊖꊨꅉꀉꎳꑳꆏ，ꄃꌊꀊꅰꀋꐳ。ꊖꑳꆹꈬꏤꄃꌠ，ꏃꏤꄃꌠꐥ。ꃼꑳꏭꆹꊖꑊꑍꂷꄃꄚꇱꄉ，ꊖꑊꇬꌍꑓꀄꊭꌺꑍꍈꁌꄉ。ꊖꌐꇔꇷꆹꃬꀮꂷꄻꁵ，ꆞꈬꇬꇢꏦꐥ，ꆞꆹꎆꍈꁵꌠꄜ，ꈍꑌꁵꌠꃥꌋꏤꐥꀋꐥꍣ，ꀬꀋꀬꍣ，ꏤꄻꌠꀋꐥ。
ꊖꃅꑳꆹꃅꋆꊷꆣꀕ，ꃰꌗꉈꌗꈏꃹꇁꀋꄎ；ꃅꑋꈺꌋꀕ，ꃘꆪꊸꑭꈏꃹꇁꀋꄏ。ꃮꎹꇁꏖꌕꈎꅑꇬꍹꀋꐛ，ꏁꆈꌩꁐꌟꃅꅩꇉꀕ，ꀋꋠꉈꉩꀕ，ꋚꂷꒉꂷ、ꇗꂷꈁꂷ、ꃢꃅꈚꎔꁮꀋꋠꆰꀋꀿ，ꀻꑳꒈꀋꋹꄷꑞꆏ，ꀀꌒꊖꑳꈤ。
ꇖ、ꌩꊨꑷꂿ
ꌩꊨꑷꂿꆹꆈꌠꀎꋏꑲꋉꇣꄉꁱꀕꇬꍸꇐꀋꉬꀋꉆꌠꉬ，ꑳꋉꇮꇐꃅꄉꇬꑌ，ꀨꊐꌠꉬꀐꌠ。ꀉꑌꌠꆹꌕꎏꏭꆏꊖꁍꅀꇓꂵ、ꊖꀌꀠꌌꍐꄉꄻꄉ，ꂴꁕꌠꆏꉬꇮꃅꊨꀻꌌꊨꐛꄉ，ꉬꇮꃅꍐꄉꌩꌌꊨꄉꌠꑌꐥ。ꑷꈓꑌꊨꀻꊨꄉꌐ，ꅐꈭꋊ、ꀃꈈꄀ、ꌍꑓꁌ，ꑳꂾꃑꏦꀒꆷꇬ，ꑙꌺꁱꂷꄀ，ꃅꄂ、ꅙꁧ、ꁮꆰꉌꊭ、ꑌꁮꉆꁮ、ꍀꁱꆿꑴꑞꑌꒃꄚꄀꄉ，ꈭꐨꆏꄂꏂꄂꅪꉙꄉ，ꈁꉜꈁꋽꀕ，ꏁꇅꁤꇅꅍꒉꐙꇅꐛ，ꑱꌆꑱꉼ，ꌠꆈꃥꌋꄰꋦꇁꈚꒌꋌꌌꍔꆗ。ꁡꇤꂷꇬ，ꋁꂷꑭꊂꑷꂿꑠꌠꋉꄉꀀꄎꌠꆹꀁꑌꐯꀁꑌ，ꑲꇽꋍꂷꌠꋍꁯꑍꁯꐥꇬꂯꇨꐯꇨꌠꉬ，ꉠꎺꇬꉪꏤꁡꇤꑲꇽꊻꂷꌕꉐꁭꎖꌠ，ꋍꁯꀊꄁꑷꂿꉾꑠꂷꋉꄉꀀ。
ꑷꂿꋉꇔꇷꈧꌠꆹ，ꉌꈲꑲꋉꌟꃅ“ꄳꍠ”ꑴꁱꈁꄻꀋꅐ。ꄁꌅ、ꇊꌤ、ꇊꂸ、ꑕꒉꏬꎴꈁꄻꀋꅐ，ꌐꑟꊐꅍꂷꋶꍈꄐꄻꄉꑲꆏ，ꑷꈯꌬꁧꇿꁧꌠꆏꑞꈚꄵꄡꑟꌠ，ꐬꇓꈍꒉꂷꄵꄡꑟꌠꌐꎼꇁ，ꄿꏀꊋꅑꈧꌠꄚꇇꀨꄉꄵ，ꄵꌐꄻꌐꊂꄻꌩꎼꇁꄉꄖꇬꋉꎼꒉꇬꑽꅉꂷꀋꐥ，“ꄉꈭꄉꏦ、ꇔꇁꉼꏦ、ꀋꃋꑮꏦ、ꆹꈌꎵꏦ、ꑷꂿꊨꏦ”ꉬꇮꃅꉌꂵꈐꏭꀀ。ꑠꃅꄉꉌꈲꐋꀨꈧꌠꆈꌠꑲꋉꇔꇷꋋꈨꂿꇬꋌꎼꈌꀧꉛ。ꄚ，ꀃꑍꋋꄮꆏꍸꇐꄉꑳꇬꀋꄂꆈꌠꑷꂿꊌꂿꄏ，ꆀꃅꁡꇤꆹꀊꅰꀋꐥꒉꂯꄉ。
ꉬ、ꉅꇓꑳ、ꇓꂵꑳ
ꀋꉊꃅꋊ80—90ꋊꌠꇬꆹ，ꊿꀉꑌꌠꉅꇓꑳꋉꄉꀀ。ꆈꌠꀉꑌꌠꉅꇓꄻ、ꉅꇓꃚꇮ。ꋌꆹꊖꑘꊖꅪꑗꐯꑗꌠꌌꉅꇓꇷꉻꄻꎼꇁꄉ，ꊖꐬꇬꊐꃚꀉꇨꈭꐨꆏ,ꎼꈠꏿꄉ。ꑳꑭꑳꑊꆹꊖꁍꄃꄉꌠ，ꄵꄉꌠꆏꉅꇓꉬꄉ，ꉅꇓꑳꃅꉉ。ꊖꁌꉅꇓꄵꄉꌠꆹꃅꋆꆳꀋꃹ，ꃅꎸꊷꀋꇨ，ꋚꒉꍹꀋꐛꆰꀋꀿ，ꀨꎹꆽꃴꌒ。
ꇓꂵꑳꆹ，ꑳꑭꑳꑊ，ꑳꂾꑳꊂꇖꁕꌠꃅꇓꂵꌌꄻꐛꄉꌠ，ꄩꄵꄉꌠꆏꉅꇓ、ꀻꅀꉅꇓꀊꏀ“ꑘꆀꊅ”ꇮꄉ。ꇓꂵꆹꊨꃀꇈꈈ、ꉬꃘꃅꄷ、ꁁꌅꃅꈋꇓꃴꉾꌠꌌꄻꄉꌠ，ꀋꆨꌬꇐꊂꊰꄮꆹꇓꄵ、ꇓꋂꑠꌌꋍꂷꋍꂷꃅꁶꒃꌊꇁꌠ。ꀋꉊꊂꆏꇓꇽꇓꒇꏷꐕꌌꄻ。ꇓꂵꑳꆏꈬꈈ，ꌬꐕꄻꐓ，ꃅꈎꀊꎳꃅꀀꄏ，ꀃꌋꀊꆨꁮꇁꐚꇨꐥꄮꇬ，ꁮꐚꈏꃹꇁꀋꄎ，ꍩꇓꈏꃹꇁꀋꄎ，ꁮꇁꐚꇨꄡꌠꄉꀧꌠꀉꒉꃅꐥ。ꄚ，ꇓꂵꎹꇨꄻꇨ，ꃅꊋꑽꊋꃅꐙꄉ，ꊿꇓꂵꑳꄻꄉꀀꌠꀁꑌꃅꐥ。
ꀃꑍꋋꄮ，ꊿꀉꑌꌠꆹꊖꀌꀠꌌꄻꄉꌠꉌꈲꑷꃅꇊꃑꊌꀀꇉ，ꀊꆨꉪꀀꀉꒉꌠꑳꆹꈧꌠꆏꎺꏣꈬꊂꊰꇈꄉꐩꋊꁮꅉꐛꁧꂯ!
作者简介：尔古阿木，男，彝族，出生于80年代，四川凉山人。系中国少数民族作家学会会员，凉山州作家协会会员，《凉山日报》特约记者，现供职于某乡镇。擅长于彝汉双语写作，作品散见于四川《民族》杂志、《凉山文学》、《凉山日报》、《中国彝族人网》、《中国作家网》、《中国诗歌网》、《当代文谈》等报刊杂志网络媒体，公开发布诗歌、散文、小说400余篇，20万余字，有作品曾获过省州级奖。
