ꃀꌠꂷꐞꁧꀐ——ꁱꌋꐓꌞꅐꀘꁧꄉꒊꃀꐊꀑꇬꁮꌠꉠꀉꁌꍀꉐꐚꃚꁵ（彝文长诗：一位老人的离去）_彝族人网（彝人网）- 彝族文化网络博物馆_彝族人网,彝人网,彝族网，专业的彝族文化门户网站，了解彝族的网络窗口。

彝族人网: 首页 > 文学 > 彝诗馆（诗歌） > 诗歌作品集萃

ꃀꌠꂷꐞꁧꀐ——ꁱꌋꐓꌞꅐꀘꁧꄉꒊꃀꐊꀑꇬꁮꌠꉠꀉꁌꍀꉐꐚꃚꁵ（彝文长诗：一位老人的离去）

作者 ꃀꇈꆿꁬ 2026-02-05

原出处：彝族人网

摄于2015年故乡·达洛阿摩

ꀒ！ꋍꈓꈤꇈꋍꈓ—

ꆫꃀꀉꁌꌀꄝꏬꉻꏀꌠꇆ，

ꀙꃀꀉꁌꏾꈌꏬꅐꆗꌠꇆ。

ꅡꈭꀋꃀꅇꂷꋍꇬꉉꆏꊯꇬꁌꌠꊈ，

ꀎꋏꌧꃀꋋꈨꋍꋏꇈꋍꋏꄹꈞꋒꁧꌐꂯꄉ。

ꋀꊇꎻꅉꈳꅉ，ꋀꊇꃅꐪꑽꑌ。

ꑞꑌꉬꇮꄯꒉꏂꀨꈐꏭꅑꄉꐝꉅꌐꉆ。

ꏬꄲꃅꈯꄉꈴꅷꋪꀕꁍꃴꑟꀐꅀ，

ꀊꈚꅔꄧꄉꈴꅷꋪꀕꁍꃴꑟꀐꄡꐥ。

ꋀꊇꐗꃛꋍꈚꐛ，ꒌꆠꋍꈚꐥ。

ꃴꂷꋜꅇꂷꈧꌠꆹ

ꋍꇬꊯꇬꁏꌠꉬꑴꄷꇆ。

ꀃꑍꋍꄮꀊꉘꊂꋊꈧꌠꄝ

ꃅꆳꁏꌊꁧꌠꆹꀋꉬꀞ，

ꌺꇖꇱꄝꆘꅝ，ꋀꊇꋌꀋꎺꌐꀐꏭꐛ。

ꈥꇤꀕꌠꒌꆠꀉꄂꌌꄉ，ꐮꀮꐯꄑꇬꎷ，

ꀃꃀꀀꅍꀋꐥ，ꑅꇷꁬꄂꌌ

ꎧꑱꄮꆏꊨꏦꂓꄜꐮꇰꀉꄂꑴꌧ。

ꉢꈴꅷꆀꃅꁡꇤꑞꄮ，

ꃀꌠꀿꃀꈧꌠꃀꐚꄮꉢꊌꂿꋺ。

ꉈꑴꉠꀉꁌꀊꂵꇖꑻꌠꈐꏭ，

ꀉꁁꌕꑻꆹ

ꁮꅉꌡꃅꌧꈿꅉꇬꄉꀉꄂꊌꈨ。

ꀃꑍꆿꑍꉬ——

ꃅꑆꃴꇉꀕꄂꅑꆳꀋꁏꑠꑍ。

ꈊꃀꑞꄮꆏ，

ꃅꉒꈧꌠꁧꄩꄉꇁꌩꏪꇬꅞ

ꁡꇤꋋꂷꇬꆼꒆꎍꌐ。

ꆧꁨꇆ！

ꐛꒆꀐꌠꆧꁨ，

ꀃꂰꆧꁨꆹꑊꏦꅑꏭꃅꐙ。

ꑮꃀꀊꏀꁀꁱꌌꉱꄉ

ꂁꍃꂁꄉꑲꌺꇬꑌꄉꂷꌠ。

ꉠꊨꏦꀉꄂꀕꃅ，ꁡꇤꋌꈚꇬꄉ

ꁀꁻꌌꃚꋒꀁꂥꃅꑵꉙ，

ꋌꐛꋌꐙꃆꂮꑠꊱꊼꇅꑵꂿ。

ꉠꉌꂵꄂꈐꇬ，

ꀊꄶꊿꌦꑳꆅ，

ꑮꑟꅪꏷꌠꌤꋋꈨꃆꂮꆹ，

ꊾꂷꇫꐥꇬꌌꀨꇬꄈꄉꉉꉆ。

ꌤꋋꈨꋍꇅꋋꇅꆏ

ꌩꏪꇬꒈꏾꌺꌡꌙꈈꀕꃅꑗꒉ，

ꋍꇅꋋꇅꆏꒊꃀꒈꅐꇁꌠꌡ。

ꉌꂵꂶꌠꋌꌌꍶꁮꃅꄉꐂ，

ꊁꄽꂫꌤꈍꑋꅐꄿꂿ，

ꄮꈉꐊꄉꀊꄶꅔꐎꈬꊂ

ꁬꃨꌟꃅꊯꌦꃧꌦꃅ，

ꒊꃀꌡꃅꑍꒉꉖꒉꏽꎂꀕ。

ꁮꅉꉉꎼꇁꇬ，

ꊿꋌꇱꇬꇉꑓꁴꊰꌠꑠꂷ，

ꀊꆨꅑꅸꀃꑍꋍꄮꄡꇗ

ꉪꊇꐥꐨꇬꄉꈍꑋꋒꋺꑴꌦ。

ꉂꏣꅼꇻꀕꌠꐋꀨꀉꆹꑠꂷ，

ꂵꆧꉘꁮꅩꌬꀕꄮꇁꅷꉣꋓꑟ。

ꉾꃤꀉꇖꐆꃅꆈꇫꑌꈭꐨ，

ꀀꅇꀨꈍꑋꍈꑠꉉꏾꄷ。

ꅺꌡꇬ：ꀎꋏꀿꃀꃀꐚ，

ꑮꑟꅪꏷ，

ꆈꌠꁱꂷꉈꑴꎧꏸꃆꂮ

ꑠꈨꉉꋺ。

ꀅꌳꃅꆈꇫꑌꄉꉪꇬ，ꋍꉉꅇꋋꈨꇯꍝꃅ

ꌌꊼꇅꉪꈾꄡꑟ。

ꑳꃀꈍꑋꇤꋌꄀꌐꇈ

ꄓꌦꑋꌦꃅ，ꉣꑊꐮꏯꅇꂷꈍꑋꈨꌧꈿꀐ。

ꀋꃋꋋꇅꇬꆧꁨꏁꇅꅍꃅꃴꅑꐺ，

ꑳꉎꌩꏪꂶꌠꂱꃅꂱꇬꀕ，

ꏣꑟꊈ，ꐋꀨꊈ、ꃴꃶꀁꑳꊈ、

ꃺꃀꑐꂵꊈ、ꀋꁧꀿꀐꊈ、

ꉢꀃꑍꄚꇬꁮꅉꂷꌧꆍꇰꂿ。

ꁮꅉꋋꂷꆏꉠꀉꂿꉉꋺꂷ，

ꄚꉠꀉꂿꉉꄮꇬꆹ，ꋍꐥꐨꇬꄉꋌꋒꋺꂷꉬ，

ꀃꑍꋍꄮꅲꎼꇁꇬꆏ

ꇯꍝꃅꁮꅉꑠꂷꐛꀐꌠꃅꐙ。

ꀊꋨꄹꈎ，ꃅꎸꄮꐰ

ꃪꄟꁡꇤꌙꃅꌙꈈꀕ，

ꑳꅷꁉꂷꇭꁙꀉꄂ

ꌥꌦꄓꌦꃅꁨꅷꐺ。

ꃅꌗꈁꑓꌸꇬꊷꆣꀕꃅꐙ，

ꌋꐓꆺꄜꀕꄮ，

ꉠꀉꁌꍀꉐꀘꂾ，

ꉠꀉꂿꋍꀉꄉ。

ꀗꌺꂷꌋꆀꀉꁁꋍꂷ

ꋀꌕꑻꐮꐊꊾꑷꅍꆅꉁꁧ。

ꆀꃅꆈꌠꀀꅉꇬꉬꄷꆏ，

ꀙꃀꀉꁌꆹꋬꂻꈨꅪꄻꉪꊇꁵ，

ꉪꊇꉌꃀꌋꆀꒌꆠꋌꌌꊷꆣꀕ。

ꑞꐛꅹꌋꈜꍬꄉꋀꅍꀘ，

ꑞꐛꅹꉹꁌꋍꏅꁧꎁꃅꇬ

ꏄꍿꌠꂁꍃꂁꄉꃄꄉꇰ，

ꋋꈨꆹꑠꏃꇗꅉꃆꂮꐛꅹꉬ。

ꀊꋨꄹꉖꀘꌐꈭꐨ

ꀱꀁꇬꇀꄮ，ꃅꆳꋀꊇꐊꄉꁏ，

ꋀꊇꏤꏅꃭꇁꋌꁏꌊꐯꑘꀋꒃ。

ꃅꆳꂾꃚꈧꌠꆹ，

ꀑꇬꁧꎁꃅꑵꉙꑵꌠꑌꌡ，

ꀙꃀꀗꌺꈛꎼꈜꈴꈧꌠꇬꀮꄑꌠꑌꌡ。

ꀱꀁꇬꇁꈝꃀꋋꏢ，

ꈜꐯꈜꉐꌩꋦꆈꊉꀕ，

ꃄꅉꊁꐎꅐꈍꑋꄚꐛ。

ꅔꐎꈬꊂꐰꈅꅿꇁꉧꑳꀕ，

ꉇꈌꃮꅸꂷꏦꃛꌠꋦ，

ꏮꇁꁦꀮꀁꂥꍇꌠꉜꇬ，

ꌩꁧꆈꊉꀕꅡꊪꀕꑠꁧꀊꄶꋦ。

ꀋꇊꆏꃅꃴꇬꌦꌺꌊꌺꂷ

ꊪꅷꀉꁌꋩꎼꇁꌠꌡ，

ꀊꉗꃅꑓꍻꇬꀳꄉꉜꇬ，

ꁮꅉꈐꏭꌳꈄꀋꃀꂓꅑꂒꈨꑠꂷꑌꌡ。

ꀉꁌꑭꁘꋍꁘꇈꋍꁘꃅꀁꇬꉜꄉꁧ，

ꌩꁧꁦꌠꅡꊪꀕꃅꊁꋦꇈ，

ꆧꁨꈞꆈꃹꀋꁧꑴꌦ。

ꏮꌩꏪꆸꈈꉜꄮꇬ

ꆧꑭꐍꐷꀕꃅꌩꋦꅷꇿꑟꌠꊌꂿꉆ。

ꃅꆳꄡꇗꌙꈈꀕ

ꁏꇁꇬꎷ，

ꊿꌋꈴꏽꋋꌕꑻꏃꎭꐺꌠꌡ。

ꁦꀮꀁꂥꋋꂷꈛꅂꈭꐨ，

ꑬꆏꄉ，

ꎧꏸꋍꁠꆧꋍꁠꆧꃅꄻꐯꄎ。

ꑓꏮꈭꇍꉜꇬꆧꑭꇂꃴ

ꌩꏪꈐꏭꇬ，

ꋍꇅꋋꇅꆏꂱꃅꂱꇬꀕ，

ꋍꇅꋋꇅꆏ，

ꄡꇗꀱꇔꇤꏶꃅꑠꈨꇫꈌꐚ。

ꌩꏪꇬꌦꌺꌊꌺꑠꈨꀀꄷꇬꑌ，

ꋀꊇꈍꃅꑌꀀꑐꇴꀐꌠꑠꃅꉪ。

ꄚꀙꃀꀉꁌꉌꂵꀉꒉꃅꉪꌠꆏ，

ꈝꃀꋋꏢꋌꂴꆽꈍꑍꃢꈴꋺ，

ꃄꅉꋌꈚꇬꈍꃅꃅꇗꃅꌋꂄ，

ꑌꉆꈧꌠ，ꈍꃅꇗꏃꅉꈈꌠꑠꋌꅉꐚꌐ。

ꑬꆏꌐꈭꐨ，

ꋀꊇꇁꌊꇉꅶꇬꑟ，

ꇉꅶꑟꄷꆏꈁꑓꇬꑕꃅꀜꇁ。

ꈨꐚꈨꀋꐙꃅꇬꆏ，

ꐋꀋꌡꌠꂾꃚꑠꈨꇫꈌꐚꇬꎷ。

ꋀꌕꑻꀉꇙꂷꌌꐺ，

ꉈꑴꃬꊭꌺꍈꑌꌌꐺ，

ꈊꃀꌋꈴꄮ，ꍶꌋꆀꃬꊨꌺꆹꑊꋌꋒꑵꉬꄷ。

ꅇꂷꈧꌠꈨꈭꐨ，

ꀗꌺꌋꆀꉈꑴꀉꁁꂶꌠꆹ，

ꒌꈯꆠꈯꌠꌡꀐ。

ꋀꊇꌕꑻꈂꀸꇬꄉꉉꐮꀋꇰꑴꇬ，

ꊨꏦꉌꂵꇬꃨꆰꏭꃅꐙ。

ꀁꉘꑠꍈꐛꄮꆏ，

ꄡꇗꌊꈴꐺꌠꇙꀕꂷꉬꇬꑌꋭ，

ꋀꀑꏾꄩꄉꃰꅷꋍꏯꅞꃰꅷꀉꏯꅞꃅꐺ。

ꀉꁌꋍꊨꏦꀘꂾꅇꂷꌌꈍꑋꇬꈼꍣ，

ꈭꐨꋬꂻꈨꅪꄜ，

ꍃꏽꌠꅇꂷꈨꑌꉉꄚꊁꈹ。

ꑭꁗꈍꑋꁘꐕꈭꐨ，

ꀋꇊꆏꋀꌕꑻꊂꆈꊿꑠꈨꇫꈴꇁꌠꌡ，

ꑭꁘꌙꈈꀕ，ꑾꌙꏭꃅꇁꋀꊇꊂꈹꐺ，

ꀁꉘꍈꐛꇬꆏꆧꁨꂶꌠꊌꂿꉆꌦꀐ。

ꄚꀉꁌꊌꂿꇬꆧꁨꂶꌠ

ꋍꂲꆽꄉꐈꀉꑐꂷꐛ，

ꉢꉜꇬꋍꊨꏦꉌꂵꈐꏭꉪꅍꀉꑌꇨꄉ

ꑠꃅꐙꌠꉬꋭ。

ꀋꉬꀐꇬ，ꎧꏸꅝꀃꃀꊐꈧꌠ

ꐛꒌꑠꈨꋌꂿꇬꑌꃅꀋꀘ。

ꀊꅰꃅꐋꀋꌡꌠꆏ，

ꋍꇱꄓꊂꆈꊿꑠꈨ

ꂴꋍꂴꑑꃅꐮꏯꌧꈿꐺꀐꌠꃅꐚ。

ꉌꂵꉪꄉ，ꀉꇙꂶꌠꋌꅥꊼꇅꊸꇈ

ꀉꇙꂾꃚꏃꎭꇁ，

ꋌꈚꇬꆹꊿꀋꋩꃮꀋꀆꅉꈚꉬ。

ꇯꍝꃅꉉꇬ，ꀃꌋꀊꆨꑊꋌꉱꃀꌋꆀ

ꌦꌺꌊꌺꇁꐯꏑꅉꉬ，

ꋧꃅꋋꂷꇬꇯꍝꃅꑊꋌꉱꃀꐤꐥ，

ꌦꌺꌊꌺꐤꀕꉪꊇꈀꄸꑌꋌꉇꂥꀋꀘ。

ꊿꇬꑅꌠꐥ，ꀋꑇꌠꐥꇬꎷ。

ꀉꁌꇵꂷꍻꄹꅐ，

ꇂꈪꇂꄉꈝꃀꌊꈴꈍꎳꑠꏢꇁ，

ꇁꅷꒊꃀꂱꋮꑟ。

ꒊꃀꋋꏢꈭꑲꆏ，ꇁꀀꅉꑳꐮꑟꀐ，

ꑠꉬꑴꇬꀉꁌꒊꃀꋋꏢꐊꄉꐞꁧꃲ。

ꉢꉪꇬꆹ——

ꋍꀑꇬꆹꒊꃀꋋꏢꌌꁧꌠ，

ꋍꒌꆠꆹꆧꁨꂶꌠꌌꁧꌠꉬꋭ。

ꃅꄜꑟꇁꂯꄉꀐ，ꃅꍛꁯꇒꁱꇓꃅꐙꄮ

ꁡꇤꇬꊿꄓꇁꒊꃀꂱꋮꑟ。

ꀉꁌꅿꊨꏦꇭꀧ，

ꄯꒉꎭꆱ，ꊪꇖ

ꏤꏅꃭꇁ，

ꒊꃀꂱꋮꌕꈚꇬꄉꎹꊊ。

ꀉꁌꅾꀋꃈꉬꑽꌠ，

ꌺꑍꂷꌠ，

ꑠꃅꄚꄉꀉꄉꀉꁨꆹꅜꃲ。

ꀉꁌꏣꃀꏣꑟꌋꆀꃷꇎꃷꇤ

ꉬꇮꉘꁮꁖꇁꂴꆽꄉ，

ꑓꁴꑰꀕꇤꌐ。

ꄩꋋꈨꆹꉢꉉꌠꁮꅉꉬ，

ꄚꁮꅉꋋꂷꆹꉉꀋꌐꑴꌦ，

ꀃꑍꉢꉉꋋꍈꇬꑟꄉꂿ。

ꀊꋨꄮꇬꉢꇁꋧꃅꀋꑟꑴꌦ，

ꈍꑋꈎꈢꋒꁧꈭꐨ，

ꉠꀊꂵꐞꁠꀀꇭ

ꁍꐊꀿꐊꁧ，

ꀱꋪꀕꁍꃴꍀꉐꀘꂾꐊꁧꀐ。

ꀃꑍꋍꄮꉢꋧꃅꋌꈚꐥꊯꇖꈎꐛꀐ，

ꃅꈎꈍꑋꈓꇢꊭꄀꈭꐨ，

ꉠꀉꄉ——

ꑋꈌꄮꐰꃅꑆꃴꇉꀕꑴꇬ，

ꃅꆳꁏꊿꌶꇁꇬꈺꌋꀕꃅꐙꑠꑍ，

ꉣꑊꐮꐊꁍꑗꀉꒉꀊꋨꏬꇬꐩ

ꏿꅉꄉꅲꌶ。

ꊁꄽꂫꀙꃀꀉꁌꈍꃅꀘꄿꂿ，

… …

ꀉꄉꀑꇬꋧꃅꐞꁧꀐ。

ꃰꊿꑠꑵꇆ，ꂸꃃꌡꃅꅾꌦꆴꌦꃅ，

ꃱꇤꃧꃨꌡꃅꃨꌦꊯꌦꃅ。

ꀃꑍꋋꄮ，ꉢꋧꃅꐥꑍꊏꃘꈓꐛꀐ，

ꉠꊨꏦꁧꎁ，

ꈍꑋꈎꐥꄎꌠꈀꄸꑌꋋꅉꀋꐚ。

ꀊꅼꌠꆏꊨꏦꒆꄹꉇ

ꌋꆀꌦꄹꉇꃅꑍꎺꄉꄻꅐ。

ꌩꁧꇬꑌꄉꑵꉙꑵꌠꊨꊭꇆ，

ꉢꋍꇬꆎꅲꂿ，ꃰꊿꂷꐥꍂꆹꈍꎳꑵꉬ

ꃰꊿꂷꋧꃅꋌꈚꈍꑋꈎꐥꑲꆀꐥꇎꂯ。

ꃀꌠꈧꌠꋍꂷꇈꋍꂷ，

ꐮꊂꈹꁧꌐꈭꐨ，

ꋀꊇꆹꈀꄸꑌ，

ꑵꉙꑵꌐꈤꀋꉆꌠꑠꊱꐛꐥꀕ，

ꋀꊇꐥꐨꉉꌐꈤꀋꄐꌠꁮꅉꑠꂷꐛ。

ꌺꇖꈧꌠꄡꇗ，

ꆏꌧꉡꇰꃅꆏꄎꉢꂘꃅ，

ꃅꒉꆈꏸꀕꄮꃅꃴꇬꆹꏷꌺꅑꇬꎷ。

ꏷꌺꏁꇅꀕꈧꌠꆹ，ꉠꀉꂿꅿꑓꋪ，

ꃰꊿꋧꃅꐞꁧꀐꈧꌠꅿꑓꋪꉬꌐ。

ꈊꃀꆈꁨꇤꊭꀕꌠꇁꌊꋧꃅꑟ，

ꁡꇤꋌꈚꇬꊽꐬꆠꏭꃅꐙ，

ꌙꈈꀕ，ꈋꂷꀉꄂꋍꇅꋋꇅꇬꆏꏮ

ꁧꄩꉜꄉꃮꇬꎷ。

ꀃ！ꀊꄶꄩꏯꃅꏸꏁꌬꀕꀊꋨꂷꇆ，

ꃅꅂꊯꉬꉖ，

ꆧꁨꌙꈈꀕꃅꅇꂷꑞꈨꌌꇁꅽꏯꉉꋺ。

ꆏꋍꇅꉉꉡꇰꇬꍑꍓ，

ꆲꌙꀕꃅꁏꌠꑋꆳꇆ，

ꆏꁏꇁꉠꈁꑓꇬꌸ，

ꑳꊂꌩꁧꀉꆹꁦꌠꇇꇊꌋꆀ

ꆐꑊꅇꂷꌌꐮꏯꉉꌠꉫꉬ。

ꇓꆈꀋꃀ，ꏮꇁꌙꈈꀕꃅꆐꑊ

ꅇꂷꅲꐺꌠꆏꊌꂿꀕ。

ꆧꁨꈞꆈꃹꈭꐨ——

ꌩꏪꇆꆉꈬꇬꑊꋌꉱꃀꈩꃅꌒ，

ꌦꌺꌊꌺꈧꌠꀀꑌꀋꇴꑴꌦꅀ。

ꑠꉬꑲꆏꍑ，

ꋀꊇꆏꃰꊿꒌꆠꇭꀧꐞꁧꈧꌠ

ꀧꌋꃅꋍꈚꊐꄉꇬꎷ。

ꃅꄜꑟꇀꄮ，ꌩꌌꊨꄉꌠꌍꑓꇬꄉ

ꅔꐎꈬꊂꈨꑭꊌꂿꉆ。

ꃅꃤꄮꇬꉘꁮꑭꈞꆈꃹꒉ

ꊁꄽꂫꍇꌠꇁꀃꈈꃀꄳꇬꁨꐺ。

ꉌꊭꉌꇓ，ꋌꐛꋌꐙꑵꉙꑠ

ꉘꁮꆧꁨ、ꃰꊿꀑꇬ、

ꌩꄹꇓꂵ、ꈑꋧꈑꃀ

ꃅꉬꇮꑞꑵꉬꌠꈀꄸꂷꇬꌥꌐꄐ。

ꋀꊇꆹꐥꍂꀋꑍꀋꈤꌠꉫꉬ？

ꋧꃅꑭꊂꉉꌐꈤꀋꄐꌠꈍꑋꐥꑵꇆ，

ꐝꉅꀋꄐꌠꄡꇗꈍꑋꐥ。

ꃀꌠꈧꌠꇆ，

ꉢꈍꃅꊨꏦꐝꉅꀋꄐꌠ，

ꉪꇐꈧꌠꉉꀖꎼꇁꂯ。

ꀊꄀꀎꋏꀋꁌꀋꁧꃆꂮꈧꌠ，

ꊿꋅꁮꅉꅺꊈꃆꂮꑠ，

ꋽꎔꌠ、

ꀑꁮꆏꐳꌠ、

ꁌꒉꄣꅼꈧꌠ、

……

ꆍꊇꃀꌠꈭꐨ，

ꀋꇊꆏꑞꑌꆍꊇꈿꄉꌐꌠꌡ，

ꉠꉌꃀꉪꐨꆹꆧꁨꇂꃴꄉꑍꌐꀐꌟꃅꐙ。

ꍀꉐꀘꂾꇆ，ꉠꀉꁌ，

ꆏꋧꃅꐤꄮꋬꂻꈨꅪꆏꄜꎼꇁꌠꅇꂷ，

ꃆꏂꊂꑋꑠꃅꐙꇁꑴꄷ，ꅇꂷꆏꉉꋺꈧꌠꆹ

ꇯꍝꃅꐯꀐꅊꇈ。

ꌺꇖꊂꋊꆹꇯꍝꃅꁬꎶꌐ，

ꄚꉢꅇꂷꀉꁁꋍꇬꉉꆎꇰꏾ：

“ꅽꎧꈈꍔꌺꆹ，

ꌺꇖꊂꋊꌌꇿꎭꌐꀋꐚ，

ꋍꍔꊰꍒꁌꌠꎧꏸꃆꂮꑠꐛꐈꌐꀐꂼ。

ꌺꇖꈧꌠꀃꃀꁈꆸꃛ，

ꃶꉆꇬꎧꏸꌋꆀꎸꃚꐛꂨꀕ，

ꊁꄽꂫꀑꏾꐕꄉꄇꈜꐺꄮ，

ꀉꁁꊿꑠꋌꉜꑓꋪꇬꀋꊐ。

ꀊꅼꌠꆏ，ꅽꄯꒉꏂꀨꊿꇫꐪꊛꌠꀋꊌꃲ，

ꉠꀑꑌꀉꒉꀉꄂ

ꋍꉔꋋꉔꆏꌞꅍꀘꁧꑴꌦ。

ꉠꀑꑌꀄꊭꈍꄮꇯꆐ

ꉈꑴꈝꃀꀉꁁꋍꏢꋌꎹꄉꈴꐺ。”

ꈝꃀꏢꄐꉢꀦꇆ，

ꀋꉬꑲꆏꉠꀄꂼꈐꏭꑟꇁ，

……

ꁯꆮꂷꈹꉢꈛꋩꎼꇁ，

ꉡꋩꌊꌩꏪꆈꊉꀕꅉꈐꏭꆹꎻ，

ꀊꄶꌩꏪꈐꏭ，ꀑꇬꈝꃀꌋꆀꒌꆠ

ꈝꃀꁮꅷꇁ，ꈬꉙꈬꃪꉬꇮꀊꄶꐥ。

ꄡꃆꄉ，ꋍꇅꇁꉚꄉꌦꇊ，

ꉢꉈꑴꅇꂷꀉꁁꋍꇬꉉꌦꂿ：

“ꅽꄯꒉꏂꀨꇬꅑꁱꂷꈧꌠ，

ꋍꄘꈬꉐꉆꊰꈎꊿꌌꏸꑭꏸꇇꇽ

ꑭꊛꇇꊛꋺꈭꐨ，

ꀌꀠꂷꐂꇁ，

ꀆꐒꂿꆹꂾꈠꃅꐙꑠꈚꊐꌠꌡ。

ꈍꑋꈎꊂꆏꀈꈥꂯꇬꀉꄂꐥ，

ꑞꑌꀅꌳꀅꌳꃅꐜꀋꈨꆘꅝꌐꉆ。”

ꋍꈓꂾ，ꉢꇁꌊꆍꏤꑟꋺ，

ꈌꀞꄇꑴꀃꈈꃀꄳꑌꑴꌦ，

ꀉꑐꏬꏮꇢꇑꐊꑴꌦ。

ꃅꉻꇬꃆꇭꐜꀋꈨꃲ，

ꐷꈭꇬꒀꃀꑻꇁꐜꀋꈨꌐ，

ꂿꇌꏢꀉꄂꏦꄀꑳꐮꌬꁧꇬꀵꄉ。

ꀃ！ꃅꅍꎷꀋꊌ，

ꑞꑌꎆꏣꌌꀨꇬꄉ，

ꑞꑌꂓꌗꌌꀨꇬꄉ。

ꀊꆨꅑꅸꇁꇯꆐ，

ꉪꊇꆹꏃꃅꌋꂷꐥꀋꋻ，

ꀉꁌꊂꌒ，ꉪꊇꏭꈭꋏꇁꃅꑠꑌꄡꑇ。

ꉪꊇꊨꏦꑲꆀꊨꏦꈜꃀ

ꇿꁮꇿꈴꌠꐝꉅꄎ。

ꃅꃤꇀꄮ，ꉡꆹꆿꃀꂾꃚꅲꏾ，

ꀃꑍꋍꄮ，ꅔꐎꈬꊂꆿ꒜ꈧꌠ

ꑿꄚꑿꋠꇀꅉꊌꀕꑴꌦ。

ꌩꏪꇬꄉꋍꇬꏅꎼꆹꇬ，

ꁦꇙꇈꐞꃅꐙꀕꑴꌦ，

ꃰꊿꈧꌠꏭꊝꇬꁮꐚꉬꌠꅀ

ꐋꀨꉬꌠꋌꌧꌦꂯ。

ꉡꆹꀊꄶꎾꃝꌋꆀꌩꏪ

ꇉꅶꊿꀋꋩꃮꀋꀆꅉꇬꄉ，

ꇁꄿꒉꌤꌐꈧꌠ，

ꇑꂵꃧꃨꅿꈧꌠ，

ꉈꑴꀉꁁꋍꑞꋍꑵꌌꉙꇐꁱꏾ。

ꑳꉎꁍꑗꈍꑋꉪꄝꆹꏮꅂꌐ，

ꅔꐎꈬꊂꑌꇂꑿꆫꅉꇬꏜꋦꁡꊭꑟ，

ꑿꆫꀉꁌꆹ

ꃀꐚꊂꀉꑌꈎꐛꀐ。

ꊁꊛꄉꀉꁌꎁꃅꑿꆫꊿꂶꌠ，

ꈛꎼꉷꃅꇓꈓꈴꁧꈭꐨꀱꇁꀋꋻꃲ。

ꌩꏾꌌꇁꈢꋒꁧꌠꏭꑊꀠꃅꂯꅀ，

ꒈꏾꌺꌌꇁꆸꅝꁧꌐꀐꌠꏮꎺꄅꂯ。

ꐥꐨꈝꃀꇿꁮ，

ꌧꇐꂿꇐꑖꉬꃶꐚꀕꑠ，

ꋌꐛꋌꐙꈬꇬꀀꌐ。

ꉪꊇꀱꉈꑴꌩꏪꇆꆉꈬꇬꄉ，

ꐥꐨꃆꂮꎹꈹꄻꅐ，

ꀊꉘꈧꌠꁳꑾꌺꄌ

ꄌꈿꇬꑕꄉꁮꅉꌧꎻ。

ꑾꌺꑓꋪꆹꀊꉘꑓꋪꌋꆀꐯꌟ，

ꑓꋪꋍꇅꋏꄷꆏ，ꋀꑊꐮꇬꅇꄜꉆ，

ꉪꊇꉂꇁꑟꅇꀊꉘꅇꂷꇬꐊꑴꌦ。

ꃅꃤꑞꄮꃅꆳꆹ，

ꁧꄩꆼꏦꈚꌠꇬꄉꁏꇁꇬꎷ，

ꃰꊿꈀꄸꑌ，ꃅꆳꐛꒌꋌꋋꊌꂿꀋꄐ。

ꋧꃅꄩꄉꈁꏾꇁꃅꁏꇬꎷ，

ꀅꌳꃅꃅꆳꂾꃚꅱꄮ，

ꉪꊇꏯꊨꏈꐺꌠꅇꂷꈨꄚꐊꌠꌡ，

ꀋꉬꀐꇬ，ꁍꇁꀿꃀꂘꅇꑖꈈꀕ

ꑠꄚꐊꌟꃅꐙ。

ꃅꆳꂾꃚꅲꄷꆏ，

ꉠꉪꇐꈧꌠꀱꎺꏣꈐꏭꃹ，

ꉈꑴꉪꆏꀋꉊꂴꆽꈍꎳꃅꄷꈴꁧꇬꎷ。

ꎺꇁꀑꇬꌋꆀꒌꆠꐮꐞꄮꇬꑟ，

ꃰꊿꂷꄚꄉꋧꃅꐞꁧꌦꀐ。

ꈊꃀ，ꁡꇤꋌꈚꊿꋙꋠꑌꃄꄮꇬ，

ꉠꀊꂵꌙꈈꀕꃅꋧꃅꐞꁧꀐ——

ꂵꆧꉘꁮꑭ，

ꏁꌬꀕꃅꁖꇁꁡꇤꋌꈚꇬꌸꄮ，

ꉠꀉꄉꀅꌳꀕꃅꑓꋪꋏꂨꐯꇯꃲ——

ꃅꄜꇁꂯꄉ，ꃅꍛꁯꇙꁯꇘꃅꐙ

ꃅꉒꈨꇁꁡꇤꑞꄮ。

ꉠꀉꂿꐥꍂꃅꀀꑌꇴꁧꀐ——

ꀊꋨꄹꉇꃅꄜꐛꄮ，ꃅꉒꇁꉠꑓꋪ

ꈝꃀꂾꉆꅉꋌꉱꄉꇬꎷ。

ꋍꃢꇀꅉꀕ，ꀑꇬꉠꋧꃅꐞꁧꈭꐨꑲꆀ，

ꉢꇨꆰꇨꊸꃅꀱꇁꀁꇬꑟ。

ꁦꀑꉒꐎꊱꆺꀮ，

ꃅꉒꋍꈨꈘꇁꁡꇤꋌꈚꇬꆼꒆꎍ。

ꈜꎴꃅꄷꄉꉜꇬꆏ，

ꌦꌺꌊꌺꀀꅉꑠꈚꑌꌡ，

ꈴꅷꄚꑟꇬꆏ，

ꊿꋌꇱꉌꂵꂅꑣꏭꃅꐙ。

ꉢꀱꀁꇬꇁꀊꋨꄹꉇ，

ꁡꇤꇬꄿꏀꑠꂷꇤꅷꉡꋩꇁ，

ꈝꃀꇂꈪꅉꈚꌠꇬꄉꉣꑊꇁꐮꊝ。

ꀁꇬꑟꇁꄮ，ꆀꃅꏦꃤ

ꌻꑘꂷꐛꄉꀿꃀꁦꄻꃅ，

ꌤꀋꉬꀋꉆꑠꈨꉡꇁꉚ。

ꑿꂷꌋꆀꎸꃚ，ꎧꏸ

ꋀꊇꉬꇮꉠꇁꉚ——

ꃰꊿꂷꋧꃅꐞꁧꄮ，

ꈍꃅꋭꌠꄚꄉꃅ。

ꋍꊂꈭꐨꑲꆀ，

ꃷꇎꃷꇤꏣꃀꏣꑟꑓꁴꄚꄉꅐ，

ꊁꄽꂫꑲꆀ，ꏃꎭꌊꑳꂲꆽꇱꋓꄉꃆꄔꇤꐛ，

ꃰꊿꂷꋍꍂꐥꐨꄚꄉꌐ。

ꃀꌠꀉꁌꑠꂷ，

ꁡꇤꋌꈚꇬꐞꁧꄮ，

ꉪꊇꌤꈍꃅꀋꆷꀋꃹꑠꈨꐥꄿꂿ

ꑬꆏꄉꇬꎷ。

ꋍꈭꐨꂴꆽꁡꇤꋌꈚꇬ

ꃷꇎꃷꇤꆏꉇꉡꇰꃅ，

ꋍꁥꇈꋍꁥꄹꊛꄉꇁ。

ꀋꉬꀋꉆꌠꆏ，ꊿꋍꂷꅀꀋꉬꀐꇬꑍꂷ

ꇤꅷꃀꌠꋋꂷꏣꃀꏣꑟꇴꁧ。

ꀋꄸꄷꏣꑟ，ꈭꑌꈛꑌꅉꇬꀀꌠꉬꑲꆏ，

ꊾꂷꇤꆏꁦꀮꀊꂥꈚꌠꇬꄉ

ꃚꋒꀊꂥꃅꇴꇬꎷ。

ꊿꋋꂷꆏꅇꂷꊒꆽꃅꄉ，

ꅽꈀꄸꈀꄸꂷꃀꐚꀐ，

ꀋꉬꀐꇬꆍꏤꑞꑷꄰꌤꀊꅼꑠꍈꐥ

ꉆꐥꃅꆏꁦꇫꇁꄷꃅꉉ。

ꊁꃅꑍꏤꄉꀊꋨꄹꉇꑞꄮꆏ，

ꃀꌠꌦꅉꇬꇁꌠꏣꃀꏣꑟ

ꂽꑼꌟꃅꎆꇌꀕꐮꐊꄉꇁꌐ。

ꈝꃀꇬꃅꉒꈍꃅꃴꄿꂿ，

ꂷꉐꆈꑰꀕꄿꂿ，

ꉘꁮꑭꊿꋌꃪꇵꂷꄧꀕꊰꄿꂿ，

ꋀꊇꈍꃅꑌꇁꇬꎷ。

ꋍꈭꐨꃀꌠꂷꋧꃅꐞꁧꄮ，

ꃮꃬ、ꇂꁮ、ꍶꑿꑠꈍꑋꀑꇬꄚꊂꁠꁧ。

ꀊꋨꄮꇬꉪꊇꃀꌠꃀꐚꄮ，

ꈀꄸꑌꉌꌒꃅꄉꋨꏦ，

ꎧꅝꄮꎧꅝ，ꎸꋠꄮꎸꋠ

ꅇꉉꄮꅇꉉꃅ。

ꋚꒉ，ꎆꏣꆿꂷꑠꁋꀘꃅꀋꐛ，

ꆏꄑꉠꄩꐂꄉꂰꌗꑠꎹꌠꀋꐥ。

ꃆꄔꆠꅪꌡ，

ꃅꃴꄂꐎꌡꃅꈀꄸꑌꐮꏯꉌꃈꑓꌒꄀ，

ꀊꋨꄮꇬꐥꌠꌋꆀꌦꌠ

ꐮꏯꁌꒉꄣꅼꃅ。

ꃺꃶꀁꑳ，ꏣꃀꏣꑟꀋꎪꀋꑴꃅꐮꐊ，

ꁱꅷꄚꑟꄮ，

ꉢꎺꆈꌠꇐꀳꀊꋨꇬꄀꇁ：

“ꌺꎝꀿꁯꆏꑮꒃꋑꋉꇈ，

ꀿꎝꌺꁯꆏꀿꃀꁦꄻꃅ。”

ꋍꑍꇈꋍꑍꉪꊇꇗꅉꏦꃤꆹꐥꑴꌦ，

ꑠꉬꑴꇬ，ꃰꊿꈧꌠꀊꆨꇗꅉꀋꌬꃲ。

ꉠꁡꇤꋌꈚꇬꄉ，

ꉢꊌꂿꋺ，ꃀꌠꋍꈨꋋꈨꇫꐥꄮ

ꆏꎇꃀꌡꃅꐥ。

ꌥꄮꇬꆹ，

ꌺꇖꈧꌠꌌꐎꃅꏂꄣꇱꄉꋨꏦꌠꌡ。

ꋀꊇꊨꏦꀁꇬ，

ꈍꃅꌢꎭꌟꁧꄿꂿ

ꏮꊿꈧꌠꉜꇬꆺꒉꄇꒉꏭꃅꐙ，

ꄷꀋꁧꀋꉬꑌꉫꎴꀕꃅ

ꈱꊨꏦꉌꂵꊏꇬꎷ。

ꃅꃴꇬꏹꐺꌠꊨꊭꇆ，ꆏꇬꉚꄉ

ꊿꋋꈨꈍꃅꑌ，ꋍꃢꆏꌤꊿꃅꄚꐕꄉ，

ꋋꈨꎁꃅꉌꂵꎭꇁꌠꉬ。

ꃀꌠꄻꃅꁵꈭꐨ，

ꆏꉜꉏꈀꄸꂷꏮꐯꉚꌠꐥꑴꌦ。

ꌺꇖꈧꌠꎆꃀꉛꌊꇁꌠꐥ，

ꀋꉬꀐꇬꉷꃅꇓꈓꄉꎆꎹꁧ，

ꎆꃀꈍꑋꈓꎹꌠꆹ，ꃀꌠꂷꃀꐚ

ꌺꑮꃀꒃꄮꆏ，ꋋꇅꃅꌬꇿꎭꌐꀋꐚ。

ꄚꀉꁁꑠꈨꐥꑴꌦ，

ꂛꊨꋊꃤꌋꆀꏣꃀꏣꑟ

ꈯꄔꇬꆹꏦꃤꄻ，ꆲꁏꏓꐯꇯꌠꐥ。

ꌳꃈꅮꋍꈨꋋꈨꆹꀿꃀꐞꁧꄮ，

ꐣꁙꐛꂨꀕ，

ꎆꃀꀘꋌꃬꅜꇬꑌꐥ。

ꀃ！ꃰꊿꅾꐛꃆꐛꂮꑠꆹ，

ꄚꆀꃅꁡꇤꋌꈚꇬꄉꁖꇁꌐ，

ꆀꃅꃰꊿꉪꇐꃅꋊꀊꏀꊂꈹꄉ，

ꉠꉌꂵꋌꌌꌃꇗꏿ。

ꉘꁮꂶꌠꀉꄂ，ꃅꃴꇬꅑꄉꅉꀕꇈꅉꀕ，

ꉪꊇꐧꇁꃰꊿꌤꆿꑞꈨꃅꋺꌠ

ꉬꇮꋌꉜꋍꑓꋪꇬꊐꄉꌐꌠꉬ。

ꀊꄶꉪꊇꋋꃆꂮꀋꉬꃅꆸꅝꁧꈧꌠꆹ，

ꉢꈍꃅꑌꇬꏭꉁꅉꉌꂵꐒꇬꎷ。

ꑋꆳ，ꆲꌙꀕꃅꁏꇁꁡꇤꌧꅗꁦꌠꇬꌸ，

ꃀꌠꀉꁌꑠꂷ，

ꌧꅗꇂꃴꄉꌐꒉꏿꄚꑌ，

ꋋꇅꇬꏮ

ꋍꄯꁯꏡꌠꉜꄉꅇꂷꑠꈨꉉ：

“ꉢꉈꑴꑞꈨꉉꄎꑴꌦꂯ？

ꉪꊇꎆꏣꆿꂷꈧꌠꉜꌊꃰꃅꌡꁨꇬꄉ，

ꐥꇐꊂꈹꑞꑌꀋꅲꀋꇝꄮ，

ꉪꊇꉈꑴꀉꁁꑞꈨꄻꇫꎭꇈꑴꌦ。

ꑞꈨꄻꊂꋊꌺꇖꁵꎻꇈꂯ？

ꉪꊇꇬꇉꒉꍷꐛꄉ，ꋋꐥꃅꂓꌗꊂꈹꄮ，

ꊨꏦꒌꆠꆹꈍꃅꑌꈥꇤꀕꀐꋭ。

ꉪꊇꇭꀧꃷꅍꎹꌧ，ꑅꇷꈧꌠꆹ

ꉈꑴꃆꄔꇤꀉꄂꐛꁧꌐꌠ。

ꀉꑳꀋ，ꎹꉼꇗꅉꐛꐈꃅꑠꉠꏯꄡꉉ，

ꈍꃅꄉꄚꐛꐈꌠꃅꋊꀊꏀꈐꏭ，

ꃶꐚꀕꃅꊨꏦꏭ……”

ꉡꆹꇯꍝꃅꃀꌠꑠꂷꉌꃹꌦꄉꏽ，

ꉠꊨꏦꑴꅉ，

ꃀꌠꂷꐥꑲꆏꉌꂵꈍꃅꇿꀋꐚ。

ꀊꂵꂷꉫꑌꍑ，ꀉꁌꂷꉬꑌꍑ

ꈍꃅꇳꄿꂿꇐꑌꌋꉆ，

ꇭꀧꉌꃀꋌꌌ

ꃆꄔꆠꅪꊸꌠꌡꃅꊷꆣꀕꌠꉬ。

ꈍꌺꇛꆷꑠꍈ，ꄻꃀꌠꂷꉣꑊꂴꆽꑌ，

ꎧꏸꑍꒀꅥꌊꄚꄉꌧꈿꑠꉬꇬꆹ，

ꉪꊇꈍꃅꑌ，

ꃅꃤꄉꌧꅷꃅꈊꊿꀀꄮꑟꄎꌠ。

ꑓꏮꉘꁮꂶꌠꉜ，ꉘꁮꑭꊖꁍꇬꁨꈭꐨ

ꉪꊇꈁꑓꇬꈴꄉꈞꆈꃹꁧ。

ꃅꆳꇆ，ꀊꄶꇑꂵꀣꈘꅍꈐꏭꌧꇁꌠꌡ，

ꃅꃤꇁꄮꑟꄷꆏ，

ꏮꁡꇤꋌꈚꉜꄉꁏꅷꇁꇬꎷ。

ꀋꃋꋋꇅꇬ，

ꉡꆹꇓꈓꈯꄔꀀ，

ꐍꊭꀕꌠꀁꇬꋋꂷꈐꏭ

ꌗꋍꌗꈻꀋꄐꄉꏽꃅꇫꐥꐺ。

ꈛꎼꈜꈴꄚꇓꈓꋌꈚꇬꑟꇁꌠ

ꀋꉬꀐꇬ，ꇓꈓꋌꈚꄉ

ꊨꏦꐴꀕꇤꄚꋦꄉꀐꌠꆀꃅꃰꊿ。

ꉢꉜꇬꉪꊇ——

ꋍꃢꆏꏓꇁꋍꈜꑌꄉ，

ꊨꏦꅿꒌꆠꂶꌠꌌꊼꇅꌧꈿ，

ꇭꀧꌋꆀꐮꐊꀕꌠꀙꃀꀉꁌꏯꊼꇅꈎꌋ，

ꅀꀋꉬꀐꇬꊨꏦꊼꇅꄺꀱꎻ。

ꀆꑸꉢꉳꁧꇂꃴ，

ꐙꃅꀉꁌꑠꂷꐞꁧꀐ，

ꋍꏣꃀꏣꑟꈧꌠꆹ，

ꋍꁥꇈꋍꁥꄹ，ꀋꆏꃅꇁꁡꇤꑟꇬꎷ。

ꉢꏮꀆꑸꉢꉳꁧꄩꉜꄮ，

ꃅꉒꊱꆺꀮꃅꁦꀑꆼꒆꎍ，

ꉘꁮꑭꃅꉒꈯꄔꍻꄉ，

ꇁꁡꇤꋌꈚꇬꌸ。

ꃄꅉꇬꃅꌗꐗꇁꇭꀧꌸꇬꊷꆣꀕ，

ꂷꉐꀋꇰꀋꉈꃅꐛꌐꈭꐨ，

ꒈꏾꌺꈳꅉꇁꄿꇬ，

ꇑꂵꏁꇅꀕ，ꃀꆏꍚꍗꌡꑠꁖꇁꌐ。

ꀊꄶꁦꀮꇢꊭꄉꒉꇁꌠꀆꐒ，

ꎲꒉꂷꒉꐝꍠꀕ，ꀑꇬꌋꆀꐯꌟ。

ꉪꊇꊿꌦꅉꇬꇁꌠ，ꎆꇌꀕꃅꉆꄉꌐꈭꐨ，

ꈎꄜꀉꒉꈧꌠꄻꇁꂴꆽꇱ。

ꎬꐚꁊꌠ，ꇂꁮꌌꌠꄻꇁꊁꇱ，

ꂴꆽꐊꈎꄜꀉꆹꈧꌠ，ꉌꑟꈺꄲꀕꃅ

ꀉꁌꂶꌠꏭꉩꆎꆹꇬꎷ。

ꉪꊇꊂꋊꌺꇖꈧꌠꆹ，

ꈂꀸꎤꆂꃮꐔꄀꄉꌠꌡ，

ꈌꁍꀋꄐꆘꅝꌐ，

ꀐ… …

ꄷꑠꇬꀉꄂꏅꑲꌧ。

ꉪꊇꑓꁴꀉꄂꌌꇁ，ꊨꏦꉌꃀꅇꄜꑲꌧ，

ꉪꊇꃆꄔꆠꅪꀉꄂꌌꇁ，

ꀑꇬꏭꐞꑲꌧ。

ꉪꊇꇯꍝꃅꀎꋏꀿꃀꂷꃀꐚꄮ，

ꈍꃅꄉꋍꊱꉩꌠꉩꑲꀋꌧꌐꀐ。

ꀊꆨꇯꆐꅑꅸꇁꌠ，

ꊿꋅꃆꂮꊿꌦꑘꀕꑠꉉꑲꀋꌧ，

ꐤꅉꐤꅉꃅ，

ꋍꃢꆏꁮꅉꈨꀉꄂꐛꉆ。

ꋍꂷꁧꇈꋍꂷ，

ꌩꁧꀉꒉꑠꁧꌩꏾꌡꃅ，

ꄮꈉꌋꆀꃅꆳꈬꇬꄉꊰꇁꊖꄩꅞ。

ꃅꆳꁏꌊꋍꏯꅞ，

ꀋꏯꅞꃅꊂꋍꈚꄉꍹꐛꌐ

ꈑꋧꈑꃀꈨꐛꌩꁧꐴꑭꀀ。

ꀊꄶꃀꌠꀉꁌꀊꋨꈨ，

ꌩꏾꌡꃅꄉꋀꊇꀋꁌꀋꁧꊂꈹꁧ，

ꋪꀕꁍꃴꀂꁧꌐ。

ꋀꊇꐗꃛꇬ，ꉇꈌꁬꌺꅿꇁꈭꐨ，

ꒌꆠꀊꄶꐥꀕꑴꌦ？

ꋀꊇꃴꂷꋝꅇꂷꈧꌠꐥꀕꑴꌦ？

ꋋꈨꃆꂮꑠꆹ，ꉢꇫꅉꀋꐚꇬꎷ。

ꉠꊨꏦꀱꊨꏦꏭꅇꄜ，

ꀋꉬꀐꇬ，

ꃅꃤꇀꄮꉉꌊꃅꆳꈧꌠꇰ，

ꃅꆳꐊꄉꉘꁮꂶꌠꈍꃅꈞꆈꃹꌠꌧꍣ。

ꃅꋆꄮꐰ，ꃰꈉꁯꊫꂫ

ꑳꊂꊾꐗꃛꃰꇱꉱꌦꀋꉆꆘꅝꌐ。

ꌩꁧꄩꇇꇊꉢꐕꎼꇁ

ꑠꃆꄔꈍꒈꑠꇤꉪꏦꄉꈭꐨ，

ꃆꄔꆠꅪꈐꏭꉪꊇꎺꏣꄚꇬꀀ。

ꈊꃀ，ꆧꁨꅐꇁꀐ，

ꆧꁨꆹꌩꏪꌋꆀꁦꀮꋌꁨꂵꆧꌡ。

ꀃ！ꀉꁌꅾꊂꋊꌺꇖ，

ꇤꈏꇬꃆꄔꊷꆣꀕꃅꐙꀕꇆ。

ꌳꈄꀋꃀꑠꂷ，ꃅꋆꈊꃀꄉ

ꀊꆨꊿꋅꃆꂮꑵꉙꑵ，

ꐝꌯꀕꃅꉙꇐꀘꇬꎷ。

ꃀꌠꀿꃀꑘꀕꇖꈭꀕꌠꉙꄷꆏ，

ꉢꎺꃅꃤꑟꇁꄮ，

ꆺꑳꀉꂿꉼꉹꂾꃚꄀ。

ꃴꂷꋜꅇꂷꆹ，ꃅꆳꁏꌊꁧꀐꌠꌡ。

ꃀꌠꀿꃀꀊꋨꈨꋧꃅꐞꁧꈭꐨ，

ꇬꂾꌞꉌꐒꇁꎭꌠꌤꑘ，

ꉢꋌꉨꀋꀽꌠꉪꇐꌋꆀꐩꋊꑠ，

ꊾꂷꃶꐚꀕꃅꉉꉡꇰꌠꀋꊌꀐ。

ꀉꁌꀋꁧꏭ，ꋬꂻꈨꅪꄜꌠꆹ

ꊂꋊꇫꐥꇈꈧꌠ，

ꐞꁧꀐꈨꌠꏭꉘꇉꐨꎹꌠꉬ。

ꉪꊇꀎꋏꀿꃀꏭꉜꒉꄉꅼꇬꎷ，

ꄡꇗꋌꐛꋌꐙꏭꁌꒉꉌꂵꑌ。

ꋧꃅꇣꄧꋌꈚꐥꇬ，

ꉪꊇꁨꀕꄏꀕꃅꌥꆅꌠꏭꊝ，

ꄡꇗꀿꃀꁦꄻꃅꌌꀨꇬꄉꇬꎷ。

ꋌꊂꈭꐨ，

ꎸꃚꌋꆀꎵꃀꌌꇁꒌꆠꏭꇗꅉꃅ，

ꊿꋅꃅꀹꋻꅑꌋꆀꉪꐨꑠꆹ，

ꀊꆨꇯꆐꅑꅸꀃꑍꋍꄮꑟꇁꌠ。

ꄚꇢꊭꇬꄉ，

ꄡꇗꋍꍈꋋꍈꆹꐛꐈꀐ，

ꃀꌠꃀꐚꄉꇴꃅꉻꃅꄮꇬ，

ꈪꑌꇔꍣꀿꅇꃀꅇꃅ，

ꑌꇐꑲꇐꃪꃅꑠꃅꀋꐛꃲ。

ꀋꇊꆏꊨꏦꈲꁧꉪꇐꃅꄉꃅꌠꌡ，

ꎆꁌꋙꀘ，ꂃꈩꑠꑖꀋꉬ。

ꑠꃅꅷꁧꇬꆹ，

ꋍꋏꊛꇈꋍꋏ，

ꌢꎭꌟꁧꌠꆹꈍꃅꑌꉪꊇꌋꆀꐯꀋꐞ。

ꑾꌺꍈ，ꃅꉒꃴꅉꌩꏪꈐꏭꄉꈜꑽ，

ꋌꉘꁮꇁꉚꄉꈨꑭꁨꅉꈝꃀꍬꂯꅀ，

ꀋꉬꀐꇬ，ꇙꀋꋏꃅꋍꈚꉆꄉ

ꀑꇬꄚꄉꌗꈘꂯ。

ꉠꀉꁌꇆ！ꄲꀘꍀꉐꐚꃚ，

ꉢꆹꆎꂿꀋꋻꇬꎷ。

ꉢꇁꋧꃅꀋꑟꑴꌦꇯꆐ，

ꆏꇤꉪꊇꊂꋊꌺꇖꐞꁧꀐ。

ꀃ！ꀘꃀꀉꁌꅽꑠꂷ，

ꄚꊿꋧꊿꀠꏇꃚꎓꁨꀕꌠꀃꂰꋋꉔ，

ꈊꃀꀀꄮ，

ꌙꈈꀕꃅꀄꂼꎔꀕꑠꂷꌌꉢꁳꇁꂸ。

ꉡꆹꅽ——

ꀉꄂꀕꃅꃄꇖꄹꊂꏹ，

ꃅꃤꇀꄮ，ꃅꆳꌋꆀꐮꐊꈛꎼꐺꌠꇖꑳꉬ。

ꉢꅂꌩꁧꀊꂥꄩ，

ꇇꇊꀊꃚꏢꌠꑌꄉꉪꈽꉆ，

ꑠꉬꑴꇬ，ꉡꆹꊨꊭꎔꎗꅾ

ꎭꈓꌋꆀꐰꇑꀋꐥ。

ꉢꀉꂿꀉꄉꍀꆿꂒꌠꑠꄻꉡꋉꄉꑴꇬ，

ꉢꈴꅷꌩꏪꇬꃹꆹꀋꋻ，

ꌩꏪꈐꏭꄉꊿꋅꑭꐨ，ꉆꈹꈌꑭꐨꎹꆹꀋꋻ。

ꉢꇁꄚꃅꁨꑭꑋꈘ，

ꏁꁱꏁꍅꀕꌠꇓꈓꋌꈚꑟꇬꎷ，

ꀉꄂꀕꃅꊿꋅꑵꉙꑵ，

ꌙꈈꀕꃅꃆꄔꆠꅪꐛꒌꏭꉪꈾ。

ꀉꁌꇊ，ꆎꆹꆀꃅꀘꂾꂷꉬ，

ꁌꄝꄮꇬ，

ꏅꍿꌡꃅꊿꈹꌌꀁꇬꀋꊐ，

ꋧꃅꃰꊿꈍꑋ，

ꅽꏯꏂꉺꉌꃀꑌꌠꐥꀋꐚ。

ꆎꆹꀙꃀꀉꁌꄷꋋꇬꂓꎘꋦꐛꅹ，

ꀒꁨꋍꁘꃅꆞꑭꍣꄉꐥꇬꎷ。

ꌊꈴꏽꅉꌋꆀꒊꃀꈯꄔꄉ，

ꅽꊨꏦꀑꇬꄚꄉꆴ。

ꀃꑍꋍꄮ，ꀘꂾꃆꂮꑠꈍꃅꐙꌠꆏꅉꐚꀕ，

ꊿꋍꈨꋋꈨꆏ——

ꀘꂾꂓꃅ

ꏦꈫꏦꎫꊿꈩꅉꇬꄉ，

ꀑꉈꇇꇤꈩꀜꊿꀦꇈꎆꃀꎴꄉꋠ。

ꉢꏮꋀꊇꐛꄟꈧꌠꉜꇬ，ꉌꈲꋚꂟꋚꇖꑠꂷꌡ。

ꋀꊇꀘꂾꂷꄷꄉꇐꑌꌋꉆꃅꀋꐛ，

ꄷꀋꁧꄚꉹꁌꋍꏅꂴꆽꄉꌞꒊꅍꐛ。

ꀃ！ꉌꃀꎭꌠ，

ꐒꊀꌠꑠꆹ，

ꁱꀕꍸꇐꈧꌠꑍꁧꌐꀐꌠꀉꄂꀋꉬ，

ꊿꋅꇢꊭꇬ

ꌧꇐꂾꇰꌠꑠꄈꀉꅰꃅ……

ꉠꀑꑌꑍꂷꌠ，

ꑞꐛꅹꀉꁌꅽꄯꒉꏂꀨꈧꌠ，

ꐪꊛꄉꃅꌊꀋꁧꂯ？

ꊂꋊꈧꌠꆹ，ꃅꋊꀊꏀꒊꃀꒉꅐꇁꌠ

ꌩꄹꇓꂵꐊꄉꁧꇬꎷ。

ꉪꇐꍹꐛꀐꌠꌡ，

ꊨꏦꃅꀹꋻꅑ，ꊿꋅꃷꋪꏦꃤꌋꆀꇁꐮꐞ，

ꋋꑠꆹꊨꏦꐴꀕꀅꌳꀅꌳꃅ

ꋊꈔꁧꉆꌠꑟꇁꌋꆀꐯꌟ。

ꈊꃀ，ꉢꈴꅷꆧꁨꑭꇁꐍꐷꀕꃅ

ꁨꄇꈜꀊꋨꏢꇬꍬꐺ，

ꄡꇗꅽꐛꒌꉢꋌꊌꂿꀋꋻ。

ꃅꆳꀉꄂꌙꈈꀕꃅ，

ꉠꅳꀧꀺꆹꄉꁏꅷꐺ，

ꉌꃀꇗꄃꀕꃅꆳꈿꄉꁏ。

ꀋꉪꅍꉨꑞꀕꉬꀋꐚ，ꉠꉌꂵꇬꃹꇁꇬꎷ，

ꇤꈏꆹꈍꄮꇯꆐꊿꐆꇫꎭ，

ꏣꑟꈍꑋ，

ꀀꇙꅷꀊꄶꁱꇙꋓꆺꌠꇓꈓꇬꀀꁧ。

ꊂꋊꌺꇖꈧꌠ，

ꊨꏦꆈꌠꃢꈜꄌꈚꄉ，

ꀊꄶꑵꉙꑵꅉꇬ，ꀛꐂꅉꇬꈐꏭꃹꆹꌐ。

ꎧꅝꎧꑱꎓꁨꀕ，

ꎧꏸꌋꆀꁍꁈꃣꒌꆹ——

ꋌꈚꇬꄉꋀꊇꌌꀉꑳꌺꈩꅍꐛ。

ꎧꏸꆹꋌꇈꉈꆏ，ꁌꒉꄣꅼꌠꀋꉬꀐ，

ꎧꑱꈭꐨꈌꌟꃅꊿꊇꀸꈁꏾꇀꅉꎭ，

ꂿꌦꂾꈠꐛꈀꑌꅉꀀ。

ꀃ！ꋊꈔꋊꈤꌐꄹꌶ，

ꋋꈭꐨꆹ，

ꉈꑴꀉꁁꀊꏀꌠꅿꁮꑠꈨꅿꇁꄡꐥ，

ꀉꏀꃅꒃꇁꈧꌠꁳ，ꊿꋆꌌꌄꆣꁬꎶꎼ。

ꉢꎺꇈꉈꁡꇤꋋꂷꇬ，

ꃀꌠꂷꎧꑱꌦꋺ，

ꌺꇖꈧꌠꎺꑴꌦꄡꐥ，ꋌꀑꇬꁠꌠꆹꎧꏸꐛꅹꉬ。

ꂵꆧꃅꎸꄮꐰ，

ꉘꁮꏁꌬꀕꃅꃅꃴꅑ，

ꉢꌙꈈꀕꃅꈛꎼ，ꌩꁧꇂꃴ

ꌐꒉꏿꅉꇬꈴꐺ。

ꁡꇤꄉꇁꌠ，ꌠꏀꑠꂷꉢꌋꆀꇁꐮꋒ，

ꉣꑊꇁꀏꑋꅉꄩꑌꄉ

ꐮꏯꋬꂻꈨꅪꄜ。

ꌠꏀꂶꌠꁮꅉꌟꃅ，

ꁡꇤꇬꌤꆿꋌꌧꉡꇰꇬ，

ꃀꌠꀉꁌꈎꄜꀉꒉꌧꅍꂿꅍꐥ

ꀊꋨꂷꋧꃅꐞꁧꀐꄷ。

ꁡꇤꋌꈚꇬ，ꉈꑴꀉꁁꋋꌋꆀꐯꌟ

ꃅꑠꐜꀋꈨꀐ。

ꉢꏮꇁꋍꑓꋪꋑꌠꉜꇬ，

ꊼꇅꐜꅑꏭꃅꐙ，

ꄚꃅꅍꎷꀋꊌꑠꍈꑌꇫꐊ。

ꉣꑊꉌꂵꈐꏭꄉ，ꉌꐒꇁꎭꃅꐙꇬꎷ，

：“ꃀꌠꂶꌠꀋꃋꌕꑻꐥ，ꌺꑍꂷꁨ，

ꋍꊂꋊꌺꇖꆹꇯꍝꃅꁬꎶꌐꌠꉬꀐ。

ꄚꑞꑌꃀꌠꋋꂷꈿꄉ，

ꆸꅝꁧꌐꀐꌠꏭꃅꐙ，ꊿꐙꊿꀋꌧ，

ꀁꇬꌋꆀꁡꇤꁡꇊꇐꑌꌋꉆꃅꀋꐛ。

ꌳꃈꅮꈧꌠꉈꏭꊋꃅꎆꎹꁧꌠꁧ，

ꀀꇙꌊꇓꈓꇬꄉꃼꇇꃅꁧꌠꁧ。

ꃀꌠꂶꌠꇫꐥꄮꇬꆹ，

ꑬꅮꊼꇅꑓꑣꃅꀻꉴꋓꇯꅑꀋꋻꄷ。

ꄚꀉꁌꏸꑭꄔꅉꑭꐨꆹ，

ꉪꊇꈀꄸꑌꇬꏡꀋꄐꌠ。

ꐞꁧꀊꋨꄹꉇ——

ꃅꊸꅩꌬꀕ，ꃅꌗꊿꌶꇬꊸꑴꄷ。

ꏮꇁꃅꃴꃅꄂꈧꌠꉜꇬ，

ꄂꐎꈧꌠꃬꆫꁬꐛꌦ，ꌍꑓꁬꐛꌦꃅ

ꐛꐈꅷꐺ。

ꀊꄶꄂꐎꃬꆫꁬꌡꃅꐙꈚꌠꆹ

ꀉꁌꅿꒌꆠꈴꆹꅉꉬꄡꑟ。

ꀊꋨꄹꉇ，ꋍꀉꑳꈧꌠꆹꃄꅉꇬꑸꑽꊪꐺ，

ꑻꇁꂷꀉꁌꎁꃅꈛꎼꀁꇬꉜꄉꇁ。

ꄚꉢꉪꇬꀉꁌꅾ

ꃴꂷꋜꌠꅇꂷꉉꀋꌐꑴꌦꏭꐛ。

ꏣꃀꏣꑟꇫꑟꇁꀊꋨꄹꉇ，

ꇌꎸꇓꁨꐛ，ꎧꏸꀆꐒꌟꃅꅝ，

ꀋꉊꂴꆽꉪꊇꅡꈭꄻ，

ꄹꃥꌵꃅꑠꐛꐈꌐꀐ。

ꈀꄸꑌꈁꒉꈁꇁ，ꈁꏾꇁꃅꋠꌐ

ꇌꎸꃮꎸ，ꑸꑽꃚꄉꈨꌡꃅꆈꁨꀕ，

ꇇꇐꀊꄖꃅꀉꁌꏭꋨꏦꇫꎭ。

ꀋꄸꄷꋌꇫꐥꄮꇬ，

ꐥꐨ——ꀃ

ꑠꃅꋠꇎꅝꄀꃅꐙꑲꆏꍑꀐꌠꉬ。

ꀉꁌꌌꇁꃅꁵꀊꋨꄹꉇ，

ꊿꈧꌠ，ꊾꂷꋍꇬꄹꎓꁨꃅꉩꌊꆹꌐ。

ꃆꄔꆠꅪꆹ——

ꉘꁮꇂꃴꄉꉼꀕꉻꄹꐞ，

ꃅꇴꃴꑐꀕ，

ꃅꆳꁏꅷꃅꃴꇬꉜꄉꆹ。

ꊂꏭꈍꑋꁮꆪꐛꈭꐨ，

ꐗꃛꇬꉇꈌꁬꌺꅿꇁꌐ，

ꐛꑿꈧꌠꇖꈭꀕꃅꇁꄚꄉꃧꃨꍘ。

ꋋꈨꂿꄷꆏ，

ꀑꇬꆹꑠꃅꄉꋧꃅꐞꁧꌠꉬꋭ。”

ꌠꏀꂶꌠ，ꀂꉘꁮꈞꆈꃹꂴꆽꀀꇬꑟꑲꆀꍑꄷ，

ꑠꅹꄚꄩꃀꌠꋧꃅꐞꁧꃆꂮꋋꈨ

ꉣꑊꊛꄉꀋꉉꀐ。

ꀒ！ꉠꀉꁌꇆ，

ꀃꂰꋋꉔꏮꇁꃅꃴꉜꇬ，

ꃅꏸꏁꐷꀕꀐꂼ。

ꉠꉌꃀꄁꃰꏿꄉꀀꑌꇴꒉꀋꅲꇬꎷ，

ꄡꃆꄉ，ꋍꇅꇁꉚꄉꂿ，

ꉢꉘꇉꐨꐥꌠꆏ，ꆏꇁꅷꉠꀄꂼꈐꏭꑟꇁ

ꉌꐒꌠꉫꄿꂿ——

ꉌꇿꄿꂿ，

ꆎꆹꈍꃅꑌꀄꂼꈐꏭꑟꇁꀋꋻꇬꎷ。

ꀄꂼꈐꏭꈍꑋꃢ，ꉠꆺꑳꀉꄉꋧꃅ

ꐞꁧꀐꂶꌠꉣꑊꐮꂿꋺ。

ꄚꈍꃅꄿꂿꋍꈁꑓꉢꋋꊌꀋꂿ，

ꃅꋆꈊꃀꋋꉔꇆ，

ꉢꌗꁮꌗꑌꑭꄹꇬꐥ。

ꆈꋧꋪꌠꈐꏭꆹꑞꑌꄚꄉꒆꇁꉆ，

ꉪꇐꃆꄔꌟꃅꐞꂯꅀ，ꀋꉬꀐꇬꒌꆠꌋꆀ

ꇭꀧꇁꐮꐞꀐꌠꉬ。

ꌙꈈꀕꌠꈊꃀꇆ，

ꀒ！ꈬꌩꈬꇓꑞꑌꄚꄉꐛꐈꉆ。

ꃅꋆꈊꃀ，ꌙꈈꀕꑴꇬꉠꉌꂵꐮꑘꀋꒃꃅꐙꇬꎷ，

ꉢꇫꐥꑴ，ꉢꌥꆅ——

ꀉꄂꀕꈥꇤꀕꌠꒌꆠꑠꂷ，

ꂮꐚꈠꆺꌊꋅꆳ

ꈐꏭꄉꁯꆮꀊꃴꑠꂷꒆꇁꂯꄐ。

ꀉꁌꇊ，

ꃀꌠꀉꁌꆏꌋꆀꐯꌟꃅꐙꀊꋨꈨ，

ꋍꂷ，

ꑍꂷ，

ꌕꑻ，

……

ꉘꁮꈞꆈꃹꒉꌠꌡꃅ，ꁦꀮꀊꂥꀂꏽꄉꀁꋌꑍꁧꌐ。

ꊂꋊꌺꇖꇫꐥꇈꈧꌠꆹ，

ꃴꂷꋜꅇꂷꀋꉬꀋꉆꌠꎺꄈꄉꑴꌦ。

ꎺꆹꎺꀋꄉꑲꆏ，

ꌩꏾꀕꃅꆳꅸꌞꃅꑟꁧꌠꌡꀐ

……

ꅡꈭꀋꃀꅇꂷ，ꀎꋏꌧꃀꅇꂷ，

ꐎꃅꏂꄣꌡ，ꃆꇭꈬꂷꁌꀋꋌꌠꑠꆹ，

ꉪꊇꉌꂵꄂꈐꀀꀆꑴꌦ？

ꈍꑋꈎꈢꋒꁧꊂꈭꐨ，

ꃅꄜꀀꄓꇀꄮꏮꌍꑓꉜꇬ，

ꉘꁮꑭ，ꅐꇁꅐꀋꇁꃅꑠꆹꉢꇬꉘꀋꇉꀐ。

(2022.04)

发布: 阿布亚编辑: 阿布亚返回顶部 ↑

黄发能丨春风里的号角——2026年中央一号文件发布

2026年中央一号...

春联，岁岁如新的文脉长歌——檐下红笺，记取乡土流年

春联，岁岁如新的...

ꃀꌠꂷꐞꁧꀐ——ꁱꌋꐓꌞꅐꀘꁧꄉꒊꃀꐊꀑꇬꁮꌠꉠꀉꁌꍀꉐꐚꃚꁵ（彝文长诗：一位老人的离去）

彝文长诗：一位老...

• 井吾都瓦原创彝文诗（三首）• 摩瑟西洛｜姿子妮乍(长诗)• 以诗取暖：在大凉山峰峦叠嶂间凸显三座神思之• 阿说阿扎：沉睡着行走的彝文（外一首）• 郁东：春伤之魂——致云南省著名文史专家张