ꉪꆈꌠꌺꇖꂷꇬꐥꌠ,ꒆꇊꋧꃅꅞꈭꐨ,ꀄꊭꃅꄮꇬ，ꀉꂿꆹꑍꐎꋚꊰꍈꌠꀊꄁꀋꉬꃅ，ꃀꅇꇪꀮꂿꌠꌌꄉꉪꉙꉪꂘꇬꎷꄉ，ꈍꄮꑲꆀꅇꉉꏰꌺꋶꇁꄎꄉꌳꉔꃅꇢꐛꇁꄎꑟꁈ。ꑠꃅꄉ，ꃀꅇꂷꋶꒉꌠꆀꉙꌋꆀꆈꌠꁱꀕꑵꌠꆹꐭꃅꋍꑍꇯꆐꇤꈫꇤꇋꀉꁌꁮꅉꐊ、ꉺꈬꉻꇤꀊꌤꀕꇠꌠꐊ、ꑮꑟꅪꏷꅉꇬꈍꈩꇐꀳꐊ、ꁮꆫꁮꈩꅉꇬꆫꌺꑵꉙꐊꄉ……ꉂꏣꉂꑟꏓꋧꃅꉪꆀꌺꆀꃀꈧꌠꌋꆀꐮꀋꐞꅷꇁꌠ。ꄚ，ꐧꋦꇬꊎꀻꎆꌠꐊꄉ，ꀃꑍꋋꄮꆏ，ꆀꉙꉉꌠꀊꅰꀊꅰꀁꑌꇁꌠꌡ，ꆈꌠꁱꂷꌷꌠꌋꆀꁊꁘꐨꑌꈜꀕꀁꃶꌺꃅꐙꇁꌠꌡ。ꆀꃅꁱꀕꀻꎆꈝꃀꈍꏯꁮꄿꂿ，ꅽꉪꐯꇰꒌꈎꃅꈎ，ꆠꑟꃅꑟꄻꅐꏭꐛ，ꈀꄸꑌꇇꄻꐯꌫꄉ，ꊋꏓꋍꏢꃅꄉ，ꊋꑌꌠꊋꅐ，ꁈꐥꌠꁈꏂꃅꄉ，ꁍꁈꍸꇐꇰꀋꃀꌠꌌꄉꄔꊒꂷꇭꌟꃅꆏꊛꉢꁳꃅꄉꄔꉘꄔꅪꐩꆹꎼꈜꁮ……
ꆀꉙꅇꂷꋋꑵꆹꉢꋌꉘꋌꉚꀉꒉꈭꐨꋌꌌꐧꋦꈬꊂꂿꄐꐥꊿꑠꂷꐛ。ꋍꍂꀱꌐꀋꉆꌠꆹꆀꉙꄻꉠꇖꇈꌠꑆꊋꇰꀋꃀꌠꉬ。ꉢꅉꐚꇬ，ꀉꂿꅇꂷ、ꃀꅇ、ꂱꑱꊨꏦꅇꂷꄷꑌꉉꉆꋌꈨꆹꊿꋅꁯꅿꒆꎆꄞꄿꌋꆀꀻꎆꆹꌠꅿꅉꃀꉬ。ꊿꋅꋋꁯꌺꇖꈧꌠꉘꃀꌷꐛꌠꅇꂷꌋꆀꁱꂷꑌꉬꌠ。ꉢꆹꀊꄙꊰꉐꈎꊰꉐꃘꊰꈎꃅꌬꄻꅷꇁꈭꐨꈎꇁꆪꐊꀋꁯꀋꑍꌠꉢꅿꊿꋅꅇꂷꋋꈨꉂꅉꉌꃹꇬꎷꌟ。ꃅꆳꈍꏯꁏꄿꂿ，ꂷꉐꈍꏯꐛꄿꂿ，ꃀꅇꂷꋶꒉꌠꉂꏣꐛꀋꐈ。ꉢꈍꄮꑌꇬꄉꌌꉪꇬ，ꃀꅇꊷꆣꀕꌠꆹꀉꂿꀉꆂꐓꂿꀕꌠꌟꃅꉪꆈꌠꊿꋅꋋꁯꌺꇖꈧꌠꉌꃀꋌꌌꁨꐥꏽꄉ，ꊿꋅꋋꁯꋌꌌꄉꋍꋏꇈꋍꋏꃅꁬꏀꒆꊛꏿꇬꎷ。ꑠꐛꅹꃅꄉ，ꉢꆹꉌꊋꇗꄃꀕꇉꑭꁘꊋꑌꐱꆹꑾꌙꃅꄉ：“ꀀꅇꀂꉉꌗꅐꁦꉘꀕ，ꀀꈴꀂꍬꐱꆹꑾꌙꀕꄉ”ꈍꄮꑌꊨꏦꆀꉙꌧ，ꆈꌠꁱꂷꌬꇮꌠꎁꃅꄉꒉꋺ。
ꏮꇁꋧꃅꉜꄮꇬ，ꊿꋅꇰꀋꃀꑠꁯꉬꑲꆏꂱꑱꊨꏦꅇꂷꌋꆀꁱꂷꐥꌠꉬꅊꇈ。ꉠꅿꃀꅇꆹꆀꉙ，ꉢꆹꆀꉙꉂ，ꆀꉙꌌꄉꀑꇬꌟꃅꁌꇐꈤꃅꉜꏭꄐ。ꀊꄶꈎꇁꆪꎴꐩꋊꒊꃀꎵꑳꀕꌠꇬ，ꉢꅾꃀꅇꆀꉙꈧꌠꆹꆳꇁꉐꐊꍹꐛꌠꍹꐛꆰꀿꌠꆰꀿꎭꈓꄸꄉꄹꁆꁮꑋꂃꈩꀐꑴꇬ，ꄚꀋꑍꀋꈤꌠꆹꄡꇗꉘꇉꄔꊏꂷꇭꑠꊏꌟꃅꉪꊇꀎꋏꁍꁈꈧꌠꀨꎹꌊꐧꋦꀻꎆꌠꀃꑍꋋꄮꑟ。ꉪꊈꁍꍸꀿꁵꇈꌠꆈꌠꁱꂷꆹꑴꁱꀕꂷ，ꄜꇐꁱꂷꇬꄉꐈꎆꅷꀃꑍꋋꄮꃚꄜꁱꂷꇬꑟ。ꀊꎳꈭꐨꏁꇅꁤꇅꒉꌠꐩꋊꁱꀕꈐꏮ，ꋌꑆꊋꇰꀋꃀꌠꅐꋺꐛꅹꄉ，ꅽꉪꑠꈨꑋ，ꉌꃀꈐꏭꊷꆣꀕꃅꌳꈄꅇꄜꀬꌠꉬ，ꁍꇁꀿꎹꐩꋊꊿꋊꂷꃃꌟꃅꀱꋓꀕꄎꌠ。
ꆀꉙꅾꁌꅐꐨꆹꋌꊇꅉꃅꇬꇯꅇꎔꉐꃨꑠꑵꉬꐛꅹꌠ。ꋌꀊꄙꊰꉐꈎꊰꉐꃘꊰꈎꃅꀋꑍꀋꈤꄎꌠꒉꄸꆹ，ꋌꆹꅇꋧꅇꋲꐊꒆ、ꈛꏦꍬꏦꄐꊒ、ꅇꍝꅇꇠꊒꌸ、ꃆꃀꋽꇐꐊꈴ、ꉉꌒꀠꌒ、ꌷꌒꌧꌒ、ꅲꌒꅲꐝꈯꈝꀋꐮꑞꑌꐊꒆꃅꄉꐊꐛꅺ。“ꆀꐊꆀꉙꃅ，ꆀꉘꈛꍅꀕ；ꉷꐊꉷꉙꃅ，ꉷꉙꇔꍣꀕ”ꄉ，ꆀꉙꆹꉘꇉꂷꇭꑠꁙꌡꄉ，《ꅺꊈꄯꒉ》ꐩꋊꄜ，《ꂘꃅꄯꒉ》ꂘꇐꌧꄉ，ꉪꊇꂴꏭꉜꄉꐕꂿꄷꌠꑭꁘꋌꌌꈜꑽꁧꀋꄎ。
ꈎꀱꆪꊂꈹꌠꐩꋊꒊꃀꈬꊂ，ꉠꅿꃀꅇꋌꈧꌠꂷꋶꅶꇽꀕꃅꀋꑌꀋꈤꌠꁍꁈꐩꋊꈍꑋꋌꎺꁱꇬꄀꄉꇈꄉ，ꊂꋊꆀꌺꈧꌠꆹꎭꈓꂄꄉꀎꋏꁍꁈꈄꐨꌧꇈꄎ，ꊂꋊꀉꁌꉔꌠꅉꐚꇈꄉ，ꇰꀋꃀꌠꃅꐨ，ꄞꅐꌠꑌꇐꆏꊛꉢꁳꇈ。ꋌꆹꐎꃄꏂꄣꏭꀋꋌꃅꁌꇐꈤꌠ，ꁍꑘꃄꅉꏭꀋꋌꃅꊌꀋꉆꌠ，ꈜꀕꇈꃅꈄꇌꎲꄂꀋꋌꃅꊌꀋꉆ。ꂷꋶꒉꋍꄧ，ꁍꁈꅿꀑꁮꅺꐳꐨꉬꇮꄚꐊꐺ，ꏂꀨꆱꆏꐩꋊꋐ，ꏂꀨꋐꆏꁮꅉꂷ，ꐩꋊꀱꇉꅐꅉꃅ，ꁮꅉꂴꅐꊂꊛꏿ，ꆀꉙꁱꀕꐩꋊꐊꄉꎵꑳꀕꇬꎷ。
ꃰꊿꐤꆹꎴ，ꈎꆪꈜꀕꎴ。ꐩꋊꇓꂃꄓꅷꇁꄮꇬ，ꇉꊂꀀꌠꉬꄿꂿ，ꉗꊂꀀꌠꉬꄿꂿ，ꐟꈯꀀꌠꉬꄿꂿ，ꆀꃅꉌꊈꌋꆀꀕꉙꁱꀕꈧꌠꆹꀋꌋꀕꈩꇁꉪꊇꆀꌺꋍꏅꌠꅿꉂꆊꌋꆀꌦꅪꈯꊂꃹꄉ，ꇬꈉꄮꇬꆏꂿꄐꋊꇤꄎꇬꎷꄉ，ꀉꁆꊿꋅꑠꑌꉪꁌꒉꄣꅶꄉꀮꇁꄑꅇꑌꊌꋺ，ꑊꊌꅺꊊꀑꑊꁤꇅꀕꋺꌠ。
ꉢꉁꇁꅉꌠꃀꅇ，ꀉꂿꉂꏣꐝꄧꀕꌠꌟꃅꃀꅇꂷꋶꒉꌠꉂ。ꋌꆹꆈꌠꊿꋅꋌꁯꐒꇁꎭꐪ，ꇿꇁꌒꐨꎺꁱꌠꅾꒌꆠꌡ。ꇿꐪꄜꇁ，ꌒꐪꄜꇁꃀꅇꈉ；ꐒꐪꌧꇁꎭꐨꌧꇁꆀꉙꈉ。ꉠꅿꃀꅇꆹꑱꇩꅇꂷꆹꀋꉬ，ꉌꈲꅇꂷꑌꀋꉬ，ꋌꆹꉂꏣꐝꍠꀕꌠꆈꌠꅇꂷ。ꉠꅿꃀꅇꆹꋧꃅꇤꄧꐩꋊꀊꎳꀐꈭꐨꎔꃨꌠꅇꂷꁱꂷꑵ，ꋌꆹꁧꐙꇤꄧꋦꄉꁧꇁꇉꈽꅪꇬꎷꌠꂙꃨꀮ，ꆀꃅꋌꌌꑋꈌꁏꄉꃨꈍꀕꇬꎷ。ꃶꐚꃅꉉꀋꆆ！ꉠꅿꃀꅇꆹꁧꇁꇉꄩꈴꇁꌠ，ꇈꈬꇁꄿꈴꇁꌠ，ꒉꇁꃪꄩꐂꇁꌠ，ꑶꋦꐛꁓꄅꅉꈴꇁꌠ，ꑶꅐꇵꇗꀕꅉꈴꇁꌠ，ꑭꁆꇂꍓꀕꌠꐊꇁꌠ，ꀍꄟꆈꃱꀕꌠꐊꇁꌠ，ꏤꏅꏬꅐꆗꌠꐊꇁꌠ，ꁍꈄꑳꃴꎑꌠꐊꇁꌠ，ꇌꃚꌌꄉꀻꎆꈵꃀꁱꇁꑴꅉꃅ，ꇂꀠꌌꄉꌳꈄꃅꇏꉺꁮꀒꄏꑟ。ꑠꃅꄉ，“ꍀꌺꄓꆹꁱꂷꊁꆹꅐ，ꀗꌺꄓꆹꇱꃐꊁꁳꇈ，ꇮꌺꄓꆹꈪꑌꇇꀘꊂꁳꇈꄉ”，ꋍꏅꃀꅇꂷꋶꒉꇬꎷ，ꆀꌺꊫꂫꎵꑳꀕꇬꎷ。
ꉢꋍꃢꋑꀋꋒꂱꑱꐩꋊꀊꎳꇈꏁꇅꁤꇅꒉꌠꆈꌠꁱꀕꍸꇐꇰꀋꃀꇈꏃꁍꆿꇤꒉꌠꂿꇬꎧꏸꑱꃅꑱ，ꉌꃀꐚꒉꅝꃅꐔ。ꄚ，ꉪꆈꌠꌺꇖꄹꁆꆏꊨꏦꀱꊨꏦꉜꄸ，ꆈꌠꂷꉬꄷꆏꎲꄏ，ꆈꉙꉉꇬꑊꏦꄷꑠꈨꇬꀥꐺꄮꆏ，ꊿꋌꎼꃱꋉꁮꐊꅝꌠꌟꃅꉌꀋꌒ，ꉐꆂꃮꏸꑽꌠꌟꃅꈌꐯꈌ。
ꀉꁆꊿꋅꃺꑌꑠꇯꇁꌊꆈꌠꃅꄷꑟꑲꆏ，ꀋꀨꀋꄓꎃꊒꃅꀋꐙꑴꇬ，ꄡꇗꉂꑟꐥꃅꆈꉙꈝꀋꐮꌠꑍꇬꉉꇮꑟꃅ“ꋬꂻꈨꅪ！ꈀꎭꀕ！”ꋋꈨꆹꆃꎭꃅꈋꃥꌵꊈꏢꅉ，ꋚꋠꒉꅝꅉ、ꎧꅝꏮꀞꇬ、ꈩꀜꑵꉙꅉ、ꀒꋤꉌꈲꈀꄷꑌꉉꇮꅲꇮꄉ，ꁱꀕꇢꋲꑠꑵꐛꑟꃅ。ꈜꀕꇉꉌꈲꐋꀨꇤꇉꃅꇫꂓꌠ、ꃷꐕꆿꄿꂓꌠ、ꃷꄊꏭꂓꌠꃅꑠꈨꉪꆈꌠꁱꂷ，ꆀꃅꁱꀕꋀꌋꌬꈧꎥꃪꎼꇁꇬ，ꃼꇁꑌꊝꀋꌋ，ꑳꇁꑌꊝꀋ，ꆈꌠꁱꂷꁱꏦꋽꇐꋀꊇꌌꄉꉪꂘꐺ，ꉪꆈꌠꁱꂷꀻꎆꌄꆣꇁꌠꎁꃅꊋꇤꐺꄮꇬ，ꉪꂱꑱꊨꏦꆏꊋꀋꇤꇬꆹ，ꇯꍝꃅꑊꏦꌠ，ꎲꄏꌠ，ꈜꀕꇉꆈꌠꉙꉉꇬꑊꏦ，ꆈꌠꁱꂷꌷꇬꎲꄏꄷꇬꀥꐺꌠꆈꌠꀉꑳꈨꌠꆹꀉꁌꀋꁧꒌꆠꆍꊇꌌꎲꄏꌠꉬ！
ꆀꉙꎳꏸꑵꌠꅐꇁꄮꇬ，ꄜꉺꅇꑠꇬꐥ，“ꆀꌺꂷꉬꑲꆏꆀꉙꉉꄡꑟ，ꆈꌠꂷꉬꑲꆏꆈꌠꎳꏸꌬꄡꑟ！”ꄷ。ꋌꆹꃼꇇꄜꉺꅇꑠꇬꉬꑴꇬ,ꉂꏣꃶꐚꀕꌠ，ꉂꑟꐝꍠꀕꌠꅇꂷꊷꆣꀕꑠꇬ。ꄚ，ꆈꌠꃤꀊꄂꌬꇉ，ꀉꁆꊿꋅꃤꆏꀋꌬꄷꌠꀋꉬ，ꉌꈲꁱꂷꆹꇩꏤꑭꊂꌬꈴꌠꅇꂷꁱꂷꑵ，ꍏꉸꄙꇁꃪꈎꃅꊛꎆꅷꇁꌠꁱꀕꀉꆹ，ꐨꋊꏃꁍꆿꇤꒉꌠ，ꉪꊈꆹꌞꃤꀻꎆꌠꁱꀕꌌꄉꂱꑱꊿꋅꁱꀕꀻꎆꌠꈜꏀꀺꄻꅐ，ꐛꑿꌟꃅꃨꄙꃨꉐꍘꄉꐚꒉꐔꌠꄻꅐꌶ，ꆀꉙꑌꇤꇬꄡꎭ，ꉷꉙꑌꌷꌊꄞꅐꃅꄉ，ꎔꃅꊨꏦꊿꋅꁱꀕꌌꄉꍔꆗꌶ！
ꐧꋦꀻꎆꇬꊎꇓꂃꄓꌠꌡ，ꐩꋊꐛꐈꇬꊎꒊꂃꄓꃅꄓ。ꀋꄸꄷ，ꊂꇁꑠꋍꑍꆏ，ꉪꅾꌺꇖꊂꋊꈧꌠꉪꌌꉅꇊꄟꅉꃅꄉꀨꎹꅷꇁꌠꃀꅇꆀꉙꑵꌠꋀꊇꄝꆗꅞꇨꎭꄉ,ꀉꁆꊿꋅꅇꂷꑠꑵꅀꀉꁆꅇꉙꑠꈨꌌꄉꁍꁈꅾꁮꅉꌧꐺꄮ，ꆈꌠꅿꐩꋊꍣꐺꄮꇬ，ꉪꅿꁍꁈꒌꆠꑊꏦꈍꃅꂯ？！
作者：尔古阿木 工作单位：甘洛县团结乡人民政府
